Россиянинг «Газпром нефть» компанияси Ўзбекистонда ёқилғи қуйиш шохобчалари тармоғини ишга туширишни режалаштирмоқда, деб хабар берди ТАСС компания раҳбари Александр Дюковга таяниб.
«Биз аллақачон Ўзбекистонда ишлаяпмиз, у ерга нефть ва нефть маҳсулотлари — бензин, дизель ёнилғиси, мойлаш ва битум материалларини етказиб берамиз. Ҳозир Ўзбекистонда яна бир қанча лойиҳаларни амалга ошириш, жумладан, ўз бренди остида автомобилларга ёқилғи қуйиш шохобчалари тармоғини қуриш имкониятларини муҳокама қилмоқдамиз», — деди у.
Дюковнинг қўшимча қилишича, республика барқарор иқтисодий ўсишни намойиш этмоқда ва нефть маҳсулотлари истеъмолини оширмоқда.
«Газпром нефть» ҳам углеводородларни қидириш ва қазиб олишда Ўзбекистон билан ҳамкорликни давом эттириш ниятида.
