Turkiya Oliy sudi Istanbuldagi “Reyn” tungi klubida sodir etilgan teraktda aybdor deb topilgan oʻzbekistonlik Abdulgadir Masharipovga nisbatan hukmni tasdiqladi. TASS maʼlumotlariga koʻra, mahkum 40 umrbod qamoq jazosiga hukm qilingan.
Sud Masharipovning iltimosnomasini rad etib, chiqarilgan hukmlarning qonuniyligini tasdiqladi.
Eslatib oʻtamiz, 2020-yil sentyabr oyida Masharipov 39 kishini oʻldirishda va 79 fuqaroning hayotiga suiqasd qilishda aybdor deb topilgan edi. Sud uni ogʻirlashtiruvchi holatlar bilan 40 umrbod qamoq jazosiga, shuningdek, bir qator moddalar boʻyicha 1 368-yilga ozodlikdan mahrum etishga hukm qildi.
Terakt 2017-yil 1-yanvarga oʻtar kechasi Ortakay tumanida sodir boʻlgan, oʻshanda hujumchi Reyn tungi klubida oʻt ochib, 39 kishini oʻldirgan. Ushbu jinoyat uchun javobgarlikni “Islom davlati” terrorchilik guruhi oʻz zimmasiga oldi. Keyinchalik Masharipov Istanbulning tumanlaridan birida qoʻlga olingan.
