Noqonuniy qurilishning har bir metri uchun jarima boʻlmaydi: deputatlar fikridan qaytdi
Qonunchilik palatasi Shaharsozlik kodeksiga kiritiladigan oʻzgartishlardan qoidabuzarlik bilan qurilgan har bir kvadrat metr uchun besh bazaviy hisoblash miqdori, yaʼni 2,2 mln soʻm jarimani olib tashladi. Deputatlar bunday qoidabuzarliklar uchun javobgarlik boshqa qonun bilan allaqachon kuchaytirilganini tushuntirdi.
Oʻzgarishlar haqida deputat Odil Mamadaliyev qonun loyihasini ikkinchi oʻqishda taqdim etar ekan soʻzlab berdi.
Uning soʻzlariga koʻra, hujjat dastlab ikki asosiy qismdan iborat boʻlgan. Birinchisi Urbanizatsiya va uy-joy bozorini barqaror rivojlantirish milliy qoʻmitasining vakolatlarini mustahkamlaydi, ikkinchisi esa shaharsozlik talablarini buzganlik uchun pul sanksiyalarini joriy etardi. Qayta ishlash jarayonida ikkinchi qismdan voz kechildi.
Nima uchun yangi jarimasiz ish koʻrishga qaror qilindi:
- 28-sentabr kuni qurilishdagi javobgarlikni kuchaytirgan alohida qonun qabul qilingan: ruxsatsiz koʻp qavatli uy qurganlik uchun 450 bazaviy hisoblash miqdorigacha jarima, takroriy qoidabuzarlik uchun esa jinoiy javobgarlik nazarda tutilgan;
- mansabdor shaxslarning qurilishga noqonuniy aralashuvi va foydalanishga qabul qilinmagan uylarga koʻchib kirish uchun javobgarlik belgilovchi qonunlar amal qilmoqda;
- maydonga qarab hisoblanadigan jarima turli xil qoidabuzarliklarga bir xilda qoʻllanilar edi, bu esa nomutanosib jazo va amaldagi maʼmuriy va jinoyat qonunchiligi normalari bilan takrorlanish xavfini tugʻdirardi;
- 2027-yildan «Birinchi xato uchun — ogohlantirish» tamoyili amal qila boshlashi kerak, yangi pul jarimasi esa unga mos kelmas edi.
Qabul qilingan tahrirda kvadrat metr uchun jarima yoʻq, qurilishdagi qoidabuzarliklar uchun boshqa javobgarlik choralari saqlanib qoladi.
Eslatib oʻtamiz, bugun shu palata yangi uylardan kvartira oluvchilarni himoya qilish toʻgʻrisidagi qonunni qabul qildi.
Добавьте Vzglyad.uz в предпочтительные источники Google. Это бесплатно и занимает 5 секунд, а для нас — лучшая поддержка и мотивация работать ещё лучше.