Янги ўқув йилидан бошлаб Ўзбекистондаги барча мактабларда 9-синфдан бошлаб ҳарбий-ватанпарварлик синфлари очилади. Бу ҳақда Миллий гвардия матбуот котиби Даврон Жуманазаров брифингда маълум қилди.
Бунгача бундай синфлар республика бўйича фақат 56 та мактабда ташкил этилган. У икки босқичда амалга оширилади: биринчи босқичда 2024/2025 ўқув йилида 2530 та мактабда, иккинчи босқичда 2025/2026 йилда 2536 та мактабда бундай синфлар пайдо бўлади.
Ёшларни ҳарбий-ватанпарварлик руҳида тарбиялаш мақсадида Мактабгача таълим ва мактаб таълими вазирлиги билан ҳамкорликда қарор қабул қилинди.
Эслатиб ўтамиз, президент Шавкат Мирзиёев 2021 йилда болалар ва ўсмирларни тарбиялаш мақсадида «Ватан ўғлони» ҳарбий-ватанпарварлик ҳаракати ташкил этилишини эълон қилганди.
