Нукусда озиқ-овқат ва тамаки маҳсулотлари ишлаб чиқарувчи корхона уйларни таъмирлаши белгиланди

Тошкент шаҳар ҳокимлигининг «Ягона буюртмачи хизмати» давлат унитар инжиниринг компанияси бевосита «AGRO FOOD NUKUS» МЧЖ билан Нукус шаҳри ва шимолий вилоятлардаги оғир аҳволда бўлган оилаларга тегишли уйларнинг томларини таъмирлаш бўйича шартнома тузди. Тендер ўтказмасдан, тўғридан-тўғри шартнома тузилган, дея қайд этди Telegramʼдаги «Ревизор» канали. Шартноманинг умумий қиймати 55,6 миллиард сўмни ташкил этади.

Таъкидлаш жоизки, «AGRO FOOD NUKUS» МЧЖ ихтисослашган бўлмаган дўконларда озиқ-овқат маҳсулотлари, жумладан ичимликлар, тамаки маҳсулотларининг чакана савдоси билан шуғулланади. Устав капитали — 10 млн сўм.



Шунингдек, саноат қурилиш ва пудрат ташкилотлари рейтингида ушбу корхона ҳақидаги маълумотлар топилмади. Яъни «AGRO FOOD NUKUS» МЧЖ аввал ҳам, ҳозир ҳам қурилиш ишлари билан шуғулланмаган.



Масъул идоралар, жумладан, Коррупцияга қарши кураш агентлиги ҳозирча вазиятга муносабат билдиргани йўқ.