Энергетика вазирлиги матбуот котибининг маълум қилишича, Ўзбекистонда 1 майдан электр энергияси ва табиий газ учун янги тарифлар кучга киради.
22 апрель куни Миллий матбуот марказида бўлиб ўтган анжуманда Тошхўжаев 1 июнгача ёқилғи қуйиш шохобчаларида нархлар ошмаслигини айтди. Бироқ, 2024 йил 1 июндан бошлаб АГТКШ учун табиий газнинг 1 кубометри 1800 сўмдан етказиб берилади.
«1 майдан бошлаб газ қуйиш шохобчалари нархи ошмайди. Хабарингиз бор, Вазирлар Маҳкамасининг қарорига кўра, газ қуйиш шохобчаларида сотилаётган табиий газнинг 1 кубометри учун нарх қатъий белгиланган. Нархи 1 июнгача 3350 сўм бўлади», — деди у.
Вазирлик фуқароларни ёқилғи қуйиш шохобчаларида нархларни сунъий равишда ошириб юбориш ҳолатлари ҳақида хабар беришга чақирди. Таъкидланишича, Бош прокуратура ва «Ўзэнергоинспекция» ходимлари бу масалани зудлик билан кўриб чиқади.
