Бугун, 19 ноябрь куни Ўзбекистон Республикаси Олий Мажлиси Сенатининг биринчи мажлисида камбағалликни қисқартириш ва аҳолини ижтимоий ҳимоя қилиш чора-тадбирлари муҳокама қилинди.
Камбағалликни қисқартириш ва аҳолини ижтимоий ҳимоя қилиш мақсадида келгуси йилда буджетдан 500 миллиард сўм ажратилади.
Учрашувда мамлакатимизда камбағалликни қисқартириш ва аҳолини ижтимоий ҳимоя қилиш бўйича кенг кўламли дастурлар амалга оширилаётгани таъкидланди. Тўрт йил олдин аҳолининг 23 фоизи даромади ҳатто қашшоқлик чегарасига ҳам етмаган эди.
Ўтган даврда 3,5 миллион фуқарога даромад олиш имконияти яратилиб, камбағаллик даражаси 11 фоизгача пасайтирилди. Келгуси уч йилда уни 7 фоизга тушириш режалаштирилган.
Бундан ташқари, янги йилдан бошлаб 65 турдаги ижтимоий хизмат ва ёрдам ҳамда 50 га яқин турли имтиёзларни ўзида мужассамлаштирган ягона «Ижтимоий харита» тизими жорий этилади.
Шунингдек, даромади ёки соғлиғи туфайли оғир ижтимоий вазиятга тушиб қолган юртдошларимизни қўллаб-қувватлаш кўлами ҳам босқичма-босқич кенгайтирилади. Бунинг учун «Ижтимоий суғурта тўғрисида»ги Қонун қабул қилинади.
