Joriy yilning yanvar-oktyabr oylarida Oʻzbekistonga pul oʻtkazmalari hajmi 12,6 milliard dollarni tashkil etdi, bu oʻtgan yilning shu davriga nisbatan 34 foizga koʻpdir, deyiladi Markaziy bank hisobotida.
Regulyator maʼlumotlariga koʻra, barcha tushumlarning 78 foizi yoki 9,8 milliard dollari Rossiya hissasiga toʻgʻri keladi, bu oʻtgan yilga nisbatan 35 foizga koʻpdir. Qozogʻistondan 699 million dollar, AQSHdan 470 million dollar (oʻsish 37%), Janubiy Koreyadan 458 million dollar (oʻsish 71%), Turkiyadan 331 million dollar, Buyuk Britaniyadan 109 million dollar (oʻsish 76%). Yevropa Ittifoqi mamlakatlaridan toʻlovlar 340 million dollarni tashkil etdi (oʻsish 41%).
2024-yilda Oʻzbekistonga xalqaro pul oʻtkazmalari hajmining oshishi mehnat migrantlarini qabul qilayotgan mamlakatlarda iqtisodiy faollik va ish haqi darajasining oʻsishi, shuningdek, rivojlangan mamlakatlarga migratsiya koʻlamining oshishi bilan bogʻliq.
Anʼanaviy xalqaro pul oʻtkazmalari tizimlari orqali Oʻzbekistonga 7 milliard dollar kelib tushdi, bu 2023-yilning yanvar-oktyabr oylariga nisbatan 19 foizga koʻpdir. Xorijdan jismoniy shaxslarning bank kartalariga toʻgʻridan-toʻgʻri oʻtkazmalar (p2p) orqali 4,9 milliard dollar yoki 52 foizga, bank oʻtkazmalari (SWIFT) orqali esa 650 million dollar yoki oʻtgan yilga nisbatan 2,4 barobar koʻp mablagʻlar kelib tushdi.
Bank kartalariga toʻgʻridan-toʻgʻri oʻtkazmalar orqali amalga oshirilgan pul oʻtkazmalari (p2p) ulushi oʻtgan yilning mos davriga nisbatan 4 foiz bandga oshib, jami oʻtkazmalarning 39 foizini tashkil etdi.
2024-yilda p2p oʻtkazmalari hajmining oʻsishi transchegaraviy toʻlov tizimlari infratuzilmasining rivojlanishi va jismoniy shaxslar oʻrtasida ushbu xizmatlarning ommalashuvi bilan izohlanadi. Yanvar-oktyabr oylarida p2p tranzaksiyalari soni qariyb 59 millionga yetdi, bu oʻtgan yilga nisbatan 46 foizga koʻpdir.
Yanvar-oktyabr oylarida Oʻzbekistondan xorijga pul oʻtkazmalari hajmi 2,3 milliard dollarni tashkil etdi.
