Oliy Majlis Senati “Kosmik faoliyat to‘g‘risida”gi qonunni ma’qulladi, deb xabar berdi “O‘zbekkosmos” kosmik tadqiqotlar va texnologiyalar agentligi matbuot xizmati.
Yangi qonun loyihasi kosmik faoliyatning asosiy jihatlarini, shu jumladan maqsadlar, tamoyillar, davlat siyosatining yo‘nalishlari va mas’ul organlarning vakolatlarini tartibga soladi. Hujjatda Vazirlar Mahkamasi, Raqamli rivojlanish va kommunikatsiyalar vazirligi, “O‘zbekkosmos” hamda Mudofaa vazirligining vazifalari mustahkamlangan.
Kosmosda ilmiy tadqiqotlar olib borish, sun’iy yo‘ldoshlardan masofadan zondlash, aloqa va navigatsiya uchun foydalanish, shuningdek, kosmik raketa komplekslaridan foydalanish, kosmik obektlarni markirovkalash va utilizatsiya qilish masalalari shular jumlasidandir.
Senat ta’kidlashicha, qonun loyihasida ilm-fan, ekologiya, mudofaa, iqtisodiyot va ijtimoiy sohalardagi vazifalarni hal etishda kosmik texnologiyalarni qo‘llashga alohida e’tibor qaratilgan.
Qonun, shuningdek, kosmik faoliyatning atrof-muhitga, tabiiy resurslarga va aholi salomatligiga ta’sirini nazorat qilishni ham nazarda tutadi.
Davlat siyosatining asosiy maqsadlari orasida kosmik faoliyat sohasidagi strategik yo‘nalishlar va davlat dasturlarini ishlab chiqish va amalga oshirish hamda kosmik suratlarni qayta ishlash orqali iqtisodiyot tarmoqlarida qonun buzilishlarini aniqlashga ko‘maklashish kiradi.
Senatorlarning fikricha, qonun loyihasining qabul qilinishi kosmos imkoniyatlaridan qishloq xo‘jaligi, transport, geologiya, seysmik xavfsizlik va iqtisodiyotning boshqa tarmoqlarini rivojlantirish uchun foydalanish imkonini beradi.
