AQSH rasmiylari 30-sentyabrda yakunlangan 2024-moliya yilida 572 nafar migrantni O‘zbekistonga deportatsiya qildi. Bu haqda AQSH Immigratsiya va bojxona xizmati (ICE) hisobotida ma’lum qilingan.
O‘tgan yili mamlakatga atigi 88 kishi deportatsiya qilingan bo‘lsa, undan oldingi yillarda bu ko‘rsatkich yanada past bo‘lgan.
2023-yil sentyabridan 2024-yil sentyabrigacha AQSH jami 271,4 ming migrantni 200 ga yaqin davlatga deportatsiya qilgan. Bu so‘nggi o‘n yildagi eng yuqori ko‘rsatkichdir. U 2014-moliya yilidan beri eng yuqori ko‘rsatkich bo‘ldi: o‘sha yili mamlakatdan qariyb 316 ming migrant chiqarib yuborilgandi.
ICYe hisobotiga ko‘ra, Qo‘shma Shtatlardan chiqarib yuborilganlarning taxminan 32 foizi jinoiy o‘tmishga ega bo‘lgan shaxslardir. Deportatsiya qilinganlarning aksariyati AQSH janubiy chegarasini kesib o‘tgan.
2023-yilda Markaziy Osiyo davlatlaridan 50 mingdan ortiq kishi AQSH chegarasini noqonuniy kesib o‘tgan, 17 mingga yaqin o‘zbekistonlik esa boshpana so‘rab murojaat qilgan.
Iyun oyida AQSH prezidenti Jo Bayden Meksikadan AQSH chegarasini kesib o‘tayotgan noqonuniy migrantlar uchun boshpana olish qoidalarini qattiqlashtirib qo‘ydi. Yangi choralar noqonuniy migrantlar soni belgilangan 2 ming 500 kishilik chegaradan oshib ketsa, yetti kun ichida ularni darhol deportatsiya qilish imkonini beradi. Cheklovlar hamrohsiz bolalar va odam savdosidan jabrlanganlarga nisbatan qo‘llanilmaydi.
