Toshkent shahar IIBB tomonidan boshqa huquqni muhofaza qiluvchi organlar bilan hamkorlikda giyohvandlik vositalari, psixotrop va kuchli taʼsir qiluvchi moddalarning noqonuniy aylanishiga qarshi kurashish boʻyicha tezkor chora-tadbirlar amalga oshirilmoqda. Bu haqda vazirlik matbuot xizmati xabar berdi.
Bunday tadbirlar davomida Uchtepa tumanida kuchli taʼsir qiluvchi dori vositalari va sintetik giyohvand moddalar topilgan 25 yoshli erkak qoʻlga olindi. Shundan soʻng, tezkor xodimlar taqiqlangan moddalar manbasini aniqlash uchun tergovni davom ettirdilar. Maʼlum boʻlishicha, u ularni ilgari sudlangan 34 yoshli Jasur ismli erkakdan olgan.
Tezkor guruh Toshkent viloyatining Chirchiq shahriga joʻnab ketdi. Jasurning turar joyi xolislar ishtirokida koʻzdan kechirilganda, u narkolaboratoriyani tashkil etgani aniqlangan. U yerdan 42 litr giyohvandlik vositalari ishlab chiqarish uchun kimyoviy suyuqliklar, 42 gramm giyohvand moddalar, 21 tabletka kuchli taʼsir qiluvchi dori vositalari va boshqa dalillar topilgan.
Tekshiruv davomida Homid ismli shaxs qoʻlga olingan. Uning Chirchiqdagi uyida giyohvandlik vositalari va kuchli taʼsir qiluvchi dorilarning yirik partiyalari, xususan, 435 gramm giyohvand moddalar topilgan.
Huquq-tartibot idoralari maʼlumotlariga koʻra, 42 litr kimyoviy suyuqlikdan 10 kilogrammga yaqin sintetik giyohvandlik vositalari ishlab chiqarish mumkin boʻlgan. Bu miqdor 20 mingdan ortiq odamni zaharlash uchun yetarli boʻlardi. Tezkor tadbirlar natijasida 813,7 ming dollarlik giyohvandlik vositalari va kuchli taʼsir qiluvchi dori vositalari musodara qilindi.
