Toshkent uchun yana 1000 ta Yutong avtobusi xarid qilish rejalashtirilmoqda

O‘zbekiston

Transport vazirligi rahbari Yutong Bus vitse-prezidenti bilan uchrashib, Toshkent uchun yana 1000 ta yangi avtobus xarid qilish imkoniyatlarini muhokama qildi. Ilhom Mahkamov, shuningdek, Oʻzbekistonda Yutong servis xizmatlarini kengaytirish muhimligini taʼkidladi.

Oʻzbekiston Toshkent shahri uchun 1000 ta yangi avtobus sotib olish istiqbolini koʻrib chiqmoqda. Bu haqda Transport vaziri Ilhom Mahkamovning Xitoyning Yutong Bus kompaniyasi vitse-prezidenti Syuy Pen bilan uchrashuvida maʼlum qilindi.

Uchrashuvda Oʻzbekistonda jamoat transporti tizimini rivojlantirish jarayonida harakatlanuvchi tarkibni yangilash boʻyicha dolzarb vazifalar muhokama qilindi.

Shuningdek, 200 ta elektrobus xarid qilish loyihasini amalga oshirishning hozirgi holati yuzasidan fikr almashildi.

Shuningdek, elektrobuslarni xususiy tadbirkorlar tomonidan sotib olinishi uchun qulay shart-sharoitlar yaratish bilan bogʻliq jihatlar atroflicha muhokama qilindi.

Transport vaziri Oʻzbekistonda Yutong kompaniyasi tomonidan ishlab chiqarilgan avtobus va elektrobuslar soni ortib borayotganini hisobga olgan holda kompaniya tomonidan koʻrsatilayotgan servis xizmatlarini kuchaytirish zarurligini alohida taʼkidladi.

Avvalroq, 2025-yilda poytaxtga qoʻshimcha 1000 ta avtobus va QR-kodli chiptalarni sotib olish uchun 675 ta infokiosk olib kelinishi haqida yozgandik. Yil boshidan buyon yoʻlovchilar oqimi 43,5 foizga oshdi, avtobuslarning kutish vaqti esa 10-12 daqiqagacha qisqardi.

Muhim yangiliklarni oʻtkazib yubormang!

Asosiy voqealardan birinchi boʻlib xabar topish uchun Telegram kanalimizga obuna boʻling.