Шавкат Мирзиёев 19 февраль куни Ўзбекистоннинг айрим қонун ҳужжатларига ўзгартиш ва қўшимчалар киритиш билан боғлиқ қонун ҳужжатларига ўзгартиришларни тасдиқлади.
Ҳужжатга кўра, эндиликда бир шахс кетма-кет икки муддатдан ортиқ бош прокурор лавозимида ишлай олмайди. Тақиқ Сенат раиси ва Қонунчилик палатаси спикери учун ҳам қўлланилади. Ҳозирда учала раҳбар ҳам 5 йил муддатга сайланади ёки тайинланади, қайта сайланишда ҳеч қандай чекловлар йўқ.
Бундан ташқари, ҳудудлардан сайланадиган ва президент томонидан тайинланадиган сенаторларнинг умумий сони 100 нафардан 65 нафарга қисқартирилади. Доимий асосда фаолият юритувчи сенаторлар сони 25 нафар бўлиб қолади.
Сенат аъзолари депутатларнинг тегишли қўшма мажлисларида яширин овоз бериш йўли билан Қорақалпоғистон Республикаси, вилоятлар ва Тошкент шаҳридан тенг миқдорда — ҳар бири тўрт кишидан сайланади.
Сенатнинг тўққиз нафар аъзоси илм-фан, санъат, адабиёт, ишлаб чиқариш соҳасида, шунингдек, давлат ва жамият фаолиятининг бошқа соҳаларида катта амалий тажрибага ва алоҳида хизматларига эга бўлган энг обрўли фуқаролар орасидан Президент томонидан тайинланади.
Қонунчилик палатаси ва Сенатни ўз-ўзини тарқатиб юбориш ҳуқуқи жорий этилди. Шундан сўнг икки ой ичида парламент қуйи палатасига сайловлар ўтказилиши, бир ой ичида эса юқори палатанинг янги таркиби шакллантирилиши керак.
Қонунчилик палатаси Спикерининг ўринбосарлари сони 7 нафардан 2 нафарга қисқартирилди, бу лавозимда ишлаган муддатга партия ва фракцияларга аъзо бўлиш тақиқланди. Қонунчилик палатаси Спикерининг ўринбосарлари яширин овоз бериш йўли билан депутатлар умумий сонининг учдан икки қисмидан кўпроғининг овози билан қабул қилинган палатанинг қарори билан муддатидан аввал чақириб олиниши мумкин.
