Лондон–Сингапур рейсидаги оғир турбулентлик оқибатида бир киши ҳалок бўлди, бир неча киши жароҳатланди.
Singapore Airlines компаниясининг Лондон Хитроу аэропортидан SQ321 рейси Бангкокка йўналтирилди ва сешанба куни маҳаллий вақт билан 15:45 да қўнди, дея хабар беради авиакомпания.
«Биз Boeing 777-300ER бортида жароҳатланганлар ва бир киши ҳалок бўлганини тасдиқлашимиз мумкин. Самолётда жами 211 йўловчи ва 18 экипаж аъзоси бўлган», — дейилади Singapore Airlines компанияси баёнотида.
Mirror нашрининг ёзишича, самолёт экипажи Андаман денгизи узра фавқулодда сигнал берган. Шундан сўнг самолёт Бангкок аэропортига қўнишга мажбур бўлди.
Нашрнинг қайд этишича, самолёт кучли силкиниб кетганида марҳум хавфсизлик камарини тақмаган бўлган. Интернетда тарқалаётган лавҳаларда таомлар салон бўйлаб сочилганини кўриш мумкин. Самолётдан тушиш вақтида йўловчиларни шифокорлар кутиб олган.
