Britaniyaning Times Higher Education tashkiloti tomonidan tuzilgan jahon oliy taʼlim muassasalarining nufuzli reytingiga Oʻzbekistonning uchta universiteti ilk bor kirgani haqida Oliy taʼlim, fan va innovatsiyalar vazirligi maʼlum qildi.
Oʻzbekiston oliy taʼlim muassasalari orasida eng yaxshi natijani Toshkent irrigatsiya va qishloq xoʻjaligini mexanizatsiyalash muhandislari instituti (TIQXMMI) koʻrsatdi. U tabiiy fanlar yoʻnalishida 301-400 va muhandislik fanlari boʻyicha 501-600 oʻrinlar orasida joy egalladi.
Mirzo Ulugʻbek nomidagi Oʻzbekiston Milliy universiteti (OʻzMU) dunyoning tabiiy-ilmiy va matematik oliy taʼlim muassasalari orasida 601-800 guruhiga kiritildi.
Toshkent axborot texnologiyalari universiteti (TATU) pedagogika universitetlari orasida 601+ guruhiga va informatika hamda dasturlash yoʻnalishi boʻyicha 1001+ guruhiga kiritildi.
Tabiiy fanlar boʻyicha reytingda Kaliforniya universiteti, Garvard, Stenford va Massachusets texnologiya instituti yetakchilik qilmoqda. IT toifasida esa Oksford, Kembrij va MIT birinchi oʻrinlarni egalladi.
Times Higher Education reytingi 11 ta toifani qamrab oladi va universitetlarni oʻqitish sifati, talabalarning kelajak istiqbollari va boshqa mezonlar boʻyicha baholaydi.
