Uzbekistan Airports «Тошкент» аэропортидаги қурилиш-монтаж ишлари билан боғлиқ вазиятга изоҳ берди.
Аввалроқ интернетда йўл ўтказгичнинг чап томонида экскаватор таъмирлаш ишлари олиб борилаётгани ва унинг остида одамлар ўтаётгани акс этган видео тарқатилган эди. Хавфсизлик қоидаларига риоя қилмаслик билан боғлиқ бундай ҳолат фойдаланувчиларни ғазаблантирди.
Компаниянинг таъкидлашича, кўприкнинг юк кўтариш қуввати 300 тоннадан ошади, бу эса бир нечта махсус жиҳозларни қўллаб-қувватлаш имконини беради.
«Хавфсизлик чораларига келсак, аэропорт ва пудратчилар томонидан ҳар ерда маълумот белгилари ўрнатилиб, йўловчилар ва ходимларнинг ҳаракатланиши учун махсус йўлаклар ажратилган, шунингдек хавфсизлик хизмати ходимлари оқимни йўналтириш учун доимий навбатчилик олиб бормоқда», — Uzbekistan Airports хабарида.
Дастлабки учта поғона ва таянч устунлари олиб ташланганидан сўнг, одамлар ўтиши учун хавфсиз йўлаклар тозаланган жойга кўчирилади ва эстакаданинг қолган қисмининг демонтажи бошланади.
«Йўловчиларимиздан вақтинчалик ноқулайликлар учун узр сўраймиз ва бу ҳолатни тушунишингизни сўраймиз. Тез орада Тошкент халқаро аэропорти тубдан ўзгаради.», — дейилади компания хабарида.
