Ўзбекистонда «Барқарор ўрмон ландшафтларини тиклаш» лойиҳаси амалга оширилмоқда. Президент тегишли қарорни имзолади.
Ҳужжатга кўра, лойиҳанинг умумий қиймати 205,45 млн долларни, Ўзбекистоннинг ундаги улуши 52,45 млн долларни ташкил этади. Халқаро тараққиёт ассоциацияси 30 йил муддатга, жумладан, беш йиллик имтиёзли муддатга 142 млн доллар миқдорида қарз маблағларини жалб қилади.
«Натижада 175 минг гектар ўрмон ва 38 минг гектар яйлов тикланади, 19 минг гектар қишлоқ хўжалиги ва 5 минг гектар саноат кўчатлари барпо этилади, 63 километрлик экологик йўлаклар ташкил этилади ва ривожлантирилади», — дейилади хабарда.
Лойиҳанинг мақсадлари Ўзбекистонда ўрмонлар майдонини кенгайтириш, иқтисодиётнинг моддий-техник базасини мустаҳкамлаш ва экотуризмни ривожлантиришдан иборат. Олти йил мобайнида ўрмонларни тиклаш ва муҳофаза қилиш жараёнига инновациялар ва ахборот технологияларини жорий этиш режалаштирилган.
Лойиҳани Ўзбекистон Экология, атроф-муҳитни муҳофаза қилиш ва иқлим ўзгаришлари вазирлиги ҳамда Ўрмон хўжалиги агентлиги амалга оширади ҳамда уни амалга ошириш муддатлари, мувофиқлаштириш ва бошқариш учун жавобгар бўлади.
Бундан ташқари, бошқармалар томонидан жалб қилинган маблағлар ва грантларнинг ўз вақтида қайтарилиши ҳамда уларнинг ўз вақтида қайтарилиши устидан назорат ўрнатилади.
