Тошкент шаҳрининг Мирзо Улуғбек туманида ўлим билан якунланган йўл-транспорт ҳодисаси содир бўлди, деб хабар бермоқда Тошкент шаҳар ИИББ матбуот хизмати.
Маълумотларга кўра, ЙТҲ 11 май куни тахминан соат 4:00да Феруза кўчасида Oqtepa Lavash биноси рўпарасида содир бўлган. Malibu-2 ҳайдовчиси (2004 йилда туғилган) 45 ёшли эркакни уриб юбориб, ЙТҲ содир бўлган жойдан қочиб кетган.
ЙТҲ оқибатида жабрланувчи воқеа жойида вафот этган.
Мазкур ҳолат юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш, одам ўлимига сабаб бўлса) билан жиноят иши қўзғатилган. Ҳозирда тергов ҳаракатлари олиб борилмоқда.
