Қозоғистонда Telegram компаниясининг офиси очилиши режалаштирилган. Бу ҳақда Қозоғистон Республикаси рақамли ривожланиш вазири Жаслан Мадиев маълум қилди.
«Қонунчиликка кўра, Telegram, WhatsApp ва TikTok каби интернет платформалари Қозоғистонда ваколатхонага эга бўлиши керак. Telegram билан келишувга эришилди»,— деди Мадиев.
Шунингдек, у расмийлар ноқонуний контентни олиб ташлаш ва зарарли каналларни блоклаш учун Telegram билан фаол ҳамкорлик қилаётганини таъкидлади.
МадиЭвнинг таъкидлашича, Мета билан биргаликдаги саъй-ҳаракатлар фирибгарликка қарши курашишга қаратилган. Охирги чоракда компания сунъий интеллект ёрдамида бутун дунё бўйлаб 1,2 миллиард сохта аккаунтларни блоклади.
Эслатиб ўтамиз, июнь ойида Telegram асосчиси Павел Дуров Марказий Осиёга боришини эълон қилган эди. Миллиардер Қирғизистон, Қозоғистон ва Ўзбекистонга ташриф буюрди.
Қозоғистонга сафари чоғида Дуров Остона, Олмаота, Бурабай қишлоғи ва Чарин канёнига ташриф буюрди. «Биз Қозоғистон халқи учун асосий коммуникация платформаси бўлиб хизмат қилаётганимиздан фахрланамиз ва унинг жадал иқтисодий ва рақамли трансформациясини тезлаштирадиган восита бўлиб қолишга умид қиламиз», — деб ёзган Дуров.
Шунингдек, мессенжер асосчиси Ўзбекистонга ташрифидан олган таассуротлари билан ўртоқлашди ва унга мамлакатда жуда ёққанини айтди. Унинг таъкидлашича, Ўзбекистонда Теlegram'ни яхши кўришади: мамлакатнинг 37 миллионлик аҳолисининг 70 фоиздан ортиғи Телеграмдан фойдаланади ва уларнинг бутун иқтисодиёти Telegram платформаси билан боғлиқ. Шу билан бирга, Ўзбекистонда офис очиш режалаштирилмаган.
