15 ноябрь куни қисман тан олинган республика депутатлари Россия билан инвестиция битимини кўриб чиқиши керак эди, бироқ масалани камида кейинги ҳафтага қолдирди.
Йиғилганлар парламент келишувни принципиал кўриб чиқишни рад этмагунча, барибир ажралмасликларини айтмоқда, деб хабар беради ТАСС.
Парламент биноси яқинида ички ишлар ходимлари билан тўқнашувлар содир бўлди. Кейинроқ юк машинаси парламент биноси дарвозасини бузиб киргани акс этган кадрлар пайдо бўлди. ТАССнинг ёзишича, ички ишлар органлари аллақачон «мухолифатнинг парламент биносига бостириб киришини тўхтатган.»
Сухуми шаҳридаги норозилик намойиши пайтида икки киши жароҳатланди, деб ёзади РИА Новости шаҳар тез тиббий ёрдам бош шифокорига таяниб.
Сухумида норозилик намойишлари 11 ноябрь куни бошланди. Маҳаллий телеграм каналларига кўра, қўлга олинган мухолифатчилар Россия билан инвестиция битимини ратификация қилишга қарши чиққан. Уларнинг исмлари тилга олинади: Умар Смир, Гарри Кокая, Алмасхан Арзинба, Рамаз Жопуа ва Аслан Гварамия.
«Улар Гудаут туманида яқинда имзоланган Россия-Абхазия инвестиция фаолияти тўғрисидаги битимга бағишланган жамоатчилик йиғилишидан қайтаётганларида қўлга олинган,» - деди «Абхазия халқ бирлиги форуми» мухолифат партияси раиси Аслан Барситс.
У буни сиёсий сабаблар билан таъқиб қилиш деб ҳисоблайди. Бироқ расмийлар мухолифатчилар «ноқонуний хатти-ҳаракатлари» учун ҳибсга олинганини айтмоқда. Ҳокимиятпараст АМРА-лифе телеграм-каналига кўра, ҳибсга олинганлар Абхазия парламенти биноси яқинида бўлиб ўтган воқеага алоқадор бўлиб, унда депутат Алмас Акаба калтакланган. Бундан ташқари, мухолифатчилар гўёки «Гудаут жамоатчилигини ҳокимиятни зўравонлик билан алмаштиришга чақирди.»
Мухолифатнинг таъкидлашича, ҳибсга олиш ноқонуний ва асоссиз равишда шафқатсиз бўлган. Ижтимоий тармоқларда воқеа жойидан олинган лавҳалар эълон қилинмоқда. Ҳибсга олишда 10 дан ортиқ ички ишлар ходимлари иштирок этди. «Республика» телеграм-каналининг ёзишича, ҳибсга олинганларнинг қариндошлари ёнига киритилмаган, уларнинг аҳволи ҳақида ҳам маълумот йўқ.
Гап Россия ва Абхазия ўртасидаги келишув ҳақида кетмоқда, унга кўра Россия компаниялари ўз инвестиция лойиҳаларини республика ҳудудида амалга оширишлари мумкин. Томонлар уни октябрь ойи охирида имзолаган. Ҳужжат кучга кириши учун Абхазия парламентида ратификация қилиниши керак.
15 ноябрь куни, ушбу масала кўриб чиқиладиган куни, мухолифат бекор қилишни талаб қилиб, республикада норозилик намойишларини ўтказмоқчи эди.
Абхазия (совет даврида Грузия таркибида автоном республика) 1993 йилда Грузия билан урушдан кейин мустақиллигини эълон қилди. Ўшанда Абхазиянинг мустақиллигини Грузия ҳам, дунёнинг бошқа давлатлари ҳам тан олмади.
2008 йилда беш кунлик Россия-Грузия урушидан сўнг Россия ва яна тўртта давлат: Венесуэла, Науру, Никарагуа ва Сурия минтақанинг мустақиллигини тан олди.
Грузия сепаратист Абхазия ва Жанубий Осетияни Россия томонидан босиб олинган ҳудудлар деб ҳисоблайди ва Россия Федерациясини мамлакат ҳудудий яхлитлигини бузишда айблайди, мустақилликни тан олишнинг ўзи эса Бирлашган Миллатлар Ташкилоти Грузиянинг бир қисми деб тан олган минтақа - Абхазиянинг аннекциясининг бир қисмидир.
