Soliq qo‘mitasi ma’lumotlariga ko‘ra, 2024-yilda O‘zbekistondagi yakka tartibdagi tadbirkorlar soni qariyb 283,9 mingga yetib, o‘tgan yilga nisbatan 17,9 foizga oshgan.
Yil davomida ro‘yxatdan o‘tkazilgan 148,7 ming yangi yakka tartibdagi tadbirkorning deyarli yarmi chakana savdo bilan shug‘ullanadi, 10 foizga yaqini maishiy xizmatlar ko‘rsatadi va 8 foizi hunarmandchilik ishlab chiqarishi bilan band.
Tadbirkorlarning aksariyati (83 foizi) qat’iy belgilangan daromad solig‘ini to‘laydi, 16,2 foizi aylanmadan soliqni tanlagan va 1 foizdan kamrog‘i qo‘shilgan qiymat solig‘i to‘lovchisi sifatida ro‘yxatga olingan.
Yakka tartibdagi tadbirkorlar orasida ayollarning ulushi 43 foizdan 42,7 foizgacha pasaygan. Faoliyat yuritayotgan tadbirkorlarning ko‘pchiligi Toshkent shahri, Samarqand va Toshkent viloyatlarida to‘plangan. Shu bilan birga, yangi ro‘yxatdan o‘tkazishlarning eng yuqori ko‘rsatkichlari Toshkent shahri hamda Toshkent va Andijon viloyatlarida qayd etilgan.
