AQSH prezidenti Donald Tramp antisemitizmga qarshi kurash toʻgʻrisidagi farmonni imzoladi va AQSH fuqarosi boʻlmagan kollej talabalarini va falastinparast norozilik namoyishlarida qatnashgan boshqa shaxslarni deportatsiya qilishga vaʼda berdi.
Oq uy saytida eʼlon qilingan farmonda aytilishicha, HAMASning 2023-yil 7-oktyabr kuni Isroilga hujumi universitet kampuslarida “misli koʻrilmagan antisemitik kamsitish, vandalizm va zoʻravonlik toʻlqini”ni keltirib chiqardi va yahudiy talabalar qoʻrqitish, taʼqib qilish, jismoniy tahdid va hujumlarga duch kelishdi.
Farmonda federal vazirlik va idoralar rahbarlariga 60 kun ichida antisemitizmga qarshi kurashish uchun ishlatilishi mumkin boʻlgan yangi vositalarni ishlab chiqish buyurilgan. Universitetlar, shuningdek, antisemit yoki terrorizmni qoʻllab-quvvatlovchi deb hisoblanishi mumkin boʻlgan chet ellik talabalar va xodimlarning xatti-harakatlari haqida xabar berishni ragʻbatlantiradi, shunda bu odamlar tergov qilinishi yoki deportatsiya qilinishi mumkin.
Reutersʼdan iqtibos keltirgan farmonga oid axborot byulletenida Tramp falastinparast namoyishlarni qoʻllab-quvvatlagan talabalarni deportatsiya qilish bilan tahdid qilgan. “Mamlakatda yashayotgan va jihodni qoʻllab-quvvatlovchi namoyishlarga qoʻshilgan barcha xorijliklarni ogohlantiramiz: 2025-yilda biz sizni topib, deportatsiya qilamiz. Shuningdek, men radikallik avj olgan universitet kampuslarida HAMASning barcha tarafdorlari uchun talaba vizalarini tez orada bekor qilaman”, — deyiladi byulletenda.
