8 апрель куни тахминан соат 01:00 да Россиянинг Самара вилояти Кинелский туманида йўловчи автобуси иштирокида ЙТҲ содир бўлди. Бу ҳақда вилоят йўл полицияси хабар берди.
Маълумотларга кўра, автобусда Ўзбекистон фуқаролари бўлган. «Урал-Муханово» автомобиль йўлининг 26-километрида автобус ҳайдовчиси белгиланган тезликни ошириб юборган ва оқибатда автобус йўлдан чиқиб кетган ва ағдарилиб кетган.
Автобуснинг икки йўловчиси воқеа жойида ҳалок бўлди, яна 10 га яқин йўловчи касалхонага ётқизилди.
Воқеа жойида тергов-тезкор гуруҳи, вилоят йўл инспекцияси раҳбарияти ва Россия Федерацияси Ички ишлар вазирлиги ҳудудий бошқармаси ишламоқда.
Айни пайтда ҳуқуқ-тартибот идоралари ходимлари ҳодисанинг барча ҳолатларини аниқламоқда.
