Божхона қўмитаси Ўзбекистонга энг кўп олиб кириладиган товарларнинг маълумотлар базасини ишга туширди. Kun.uz очиқ маълумотларни ўрганар экан, ёқилғи-энергетика ва нефть маҳсулотлари импорти жадал суръатлар билан ўсиб бораётганига эътибор қаратди.
2024 йилнинг январь-июль ойларида Ўзбекистонга 694,2 миллион долларлик ёқилғи-энергетика ва нефть маҳсулотлари импорт қилинди. Ўтган йилга нисбатан ушбу гуруҳдаги товарлар импорти 52,4 фоизга ошган.
Суюқ ёқилғи импорти айниқса сезиларли даражада ошди. Ўтган йилнинг етти ойида мамлакатимизга 1943 тонна ушбу турдаги ёқилғи импорт қилинган бўлса, жорий йилда 19025 тоннага етди. Бу 879 фоизга, яъни 9,8 баробарга ошган.
Мазут импорти ҳам сезиларли даражада ошди: 416,5 минг тоннадан 843,6 минг тоннагача, бу 102,6 фоизга ўсди.
Январдан июлгача етти ойда мамлакатга 76,4 миллион тонна бензин импорт қилинган, бу ўтган йилнинг шу даврига (48 миллион тонна) нисбатан 28,4 миллион тоннага кўпдир. Бу 59,1 фоизга ўсган.
Дизель ёқилғиси импорти ҳам 22,4 фоизга ошди. Етти ой давомида ушбу турдаги ёқилғи импорти ҳажми 169 минг тоннадан 206,9 минг тоннагача ошди. Агар уни 2022 йилнинг январь-июль ойларидаги (28,2 минг тонна) дизель ёқилғиси импорти билан солиштирадиган бўлсак, ўсиш 7,3 баробарни ташкил этди.
2022 йил июнь ойи охирида Uzbekistan GTL заводи дизель ёқилғиси ишлаб чиқаришни бошлади. 3,42 миллиард долларлик завод ҳар йили 500 миллион долларлик импорт ўрнини босадиган маҳсулот ишлаб чиқаради.
