Тошкент халқаро аэропортида реконструкциянинг навбатдаги босқичи якунланди ва аэропорт терминалини кенгайтириш имконини берди, деб хабар бермоқда Uzbekistan Airports.
Хусусан, 2021 йилдан ҳозирги кунга қадар халқаро авиақатновлар терминалининг майдони 45 минг квадрат метрдан 65 минг квадрат метргача кенгайтирилди. Жорий йилнинг сентябрь ойида бошланадиган реконструкциянинг якуний босқичида учиб келиш ва жўнаб кетиш заллари якунда қарийб 105 000 кв.м майдонга эга бўлган ягона терминал мажмуасига бирлаштирилади. Бу аэропорт терминалининг ўтказиш қобилиятини ҳозирги соатига 1200 йўловчидан 2400 тагача оширади.
Айни пайтда учиб кетиш терминалида майдони 2500 кв.м дан ортиқ бўлган кенг зал қурилган бўлиб, ундан йўловчилар рўйхатдан ўтиш жойига лифтлар ёки эскалаторлар орқали чиқишлари мумкин. Зал ва асосий терминал биноси ўртасида ўриндиқли кичик яшил майдон мавжуд. Кейинчалик, учиб кетиш терминалининг иккинчи қаватида шаҳарга қарайдиган деярли 2200 кв.м майдонга эга яна бир очиқ терасса пайдо бўлади. Ҳар иккала терасса ҳам йўловчилар, ҳам кузатувчи ва кутиб олувчилар учун очиқ бўлади.
Мамлакат ЙҲХХ тизимлари билан интеграциялашган йўл камералари терминалга кириш йўлагига ўрнатилган. Тизим автоматик равишда ишлайди: кириш линиясида рухсат этилган тўхташ вақтидан ошиб кетган автомобиль эгаларига автоматик равишда жарима билдиришномаси юборилади. Эслатиб ўтамиз, терминалга қисқа муддатли кириш барча енгил автомобиллар, сайёҳлик автобуслари ва микроавтобуслар учун 10 дақиқагача этиб белгиланган.
Бугунги кунда учиб кетиш залида 40 та рўйхатга олиш пештахтаси мавжуд. Реконструкция ишлари тугаллангач, рўйхатга олиш пештахталари сони 90 тани ташкил этади, шу жумладан 12 та гибрид Self Chek-in и Baggage Drop Off нуқталари, уларда йўловчилар рейсларга мустақил равишда рўйхатдан ўтишлари ва багажни топширишлари мумкин бўлади. Учиб кетиш ҳудудидаги чегара назорати пунктлари сони ҳам 34 тадан 54 тага, шу жумладан E-gate, етказилади. Текширув ҳудуди 15 та йўлакгача кенгайтирилади. Шунингдек, учиб келиш залида 48 йўловчи ўтиш каналига эга янги паспорт назорати зонаси ташкил этилади, багаж олиш камарлари сони тўрттадан саккизтага кўпаяди.
Реконструкция доирасида BHS ва BRS юкларни ташиш ва назорат қилиш тизимларини жорий этиш режалаштирилган. Кетиш ва келиш учун янги ускуналар ва дастурий таъминот ўрнатилади. Тизим багажни парвозлар бўйича автоматик тарзда саралаш, багажни ташишга қабул қилинган пайтдан то бортга ортилган пайтгача кузатиб бориш, энг муҳими, бу вазиятда инсон омилини минималлаштириш имконини беради. Йўловчиларга қулайлик яратиш мақсадида багаж ёрлиғи рақами орқали юкни кузатиш имконини берувчи мобил илова ишлаб чиқиш ҳам режалаштирилган.
2023 йил бошидан ҳозирги кунгача E-аукцион электрон платформаси орқали 2600 кв.м дан ортиқ майдон ижарага берилди. Кафелар ва қаҳва бурчаклари, заргарлик буюмлари, чарм ва гастрономик дўконлар, сувенирлар ва ҳунармандларнинг ҳақиқий шарқона бозори, банкоматлар ва зарядлаш шохобчалари, халқаро SIM-карталар ва гаджетлар сотиладиган пунктлар, автоматлар ва массаж стуллари, такси хизматлари ва автомашиналарни ижарага бериш пунктлари очилди. Жорий йил охиригача кафе, соат ва заргарлик дўкони ташкил этиш, озиқ-овқат сотиш автомастларини ўрнатиш учун 200 квадрат метрдан ортиқ савдо майдонларини ижарага бериш режалаштирилган. Умуман олганда, бугунги кунда Тошкент аэропортидаги савдо шохобчалари 4800 кв.м.ни ташкил этади.
Пойтахт аэропортида Chanel, Armani, Boss, Burberry, Bvlgari, Dior, Céline, D&G, Fendi , Gucci, Jimmy, Choo, Prada, Ray Ban, Zeppelin ва бошқалар каби жаҳон брендларининг парфюмерия, кийим-кечак ва аксессуарлари сотиладиган 1200 квадрат метр майдонни эгаллаган кенг Duty Free дўкони мавжуд. Шунингдек, расталар яқин келажакда Bikkembergs, Cerutti, Samsonite, American Tourister, BRICS, Tommy Hilfiger, Calvin Klein, Tissot, Frederik Constant, Moris Lacroix, Miu Miu ва Jacquemus маҳсулотлари билан тўлдирилиши кутилмоқда.
Шунингдек, учиб кетиш терминалининг «стерил» ҳудудида, «Art Bazaar»нинг чап томонида фудкорт қурилиши бошланган, у ерда бир вақтнинг ўзида бир нечта брендлар тақдим этилади: The Border by Teriyaki, Hardee’s, Pizza Hut, La Croissanterie ва Pinkberry. Қўшимча майдоннинг қурилиши умумий жўнаш залини B5-B6-B7 чиқиш жойлари билан улаш имконини берди. Бундан ташқари, келгусида қуйи чиқиш жойларига олиб борувчи алоҳида галерея қуриш мумкин бўлади, бу эса келаётган ва кетаётган йўловчилар оқимини ажратиш ва қўшимча телетраплар ўрнатиш имконини беради.
Ҳозирда «Тошкент» аэропорти халқаро терминалининг ўтказиш қобилияти йилига 7 миллион йўловчини ташкил этади. 2023 йилда пойтахт аэропортида 6,8 миллион йўловчига хизмат кўрсатилди. Жорий йилда йўловчи ташиш ҳажми 8 миллиондан ортиқ бўлиши кутилмоқда. 2026 йилда барча реконструкция босқичлари тугатилгандан сўнг терминал топширилиши режалаштирилган. Қурилиш тугаллангач, аэропортнинг ўтказиш қобилияти йилига 13 миллион йўловчига етказилади.
