Жаҳон соғлиқни сақлаш ташкилоти (ЖССТ) ҳисоботига кўра, дунёда ҳар ўнинчи ўсмир ижтимоий тармоқлар ва компьютер ўйинларига ҳаддан ташқари берилиб кетганлиги сабабли психологик муаммоларга дуч келмоқда.
Ҳисоботда ўсмирлар ўртасида ижтимоий тармоқлардан фойдаланишнинг ўсиши қайд этилган: 2018 йилдаги 7% дан 2022 йилда 11% гача. Бу эса рақамли технологияларнинг ёшлар руҳий саломатлигига таъсири борасида хавотир уйғотмоқда.
Маълумотлар «Мактаб ёшидаги болаларнинг саломатликка муносабати» тадқиқоти доирасида олинган бўлиб, унда 2022 йилда Европа, Марказий Осиё ва Канадада 11, 13 ва 15 ёшдаги 280 мингга яқин болалар ва ўсмирлар иштирок этди.
Тадқиқотнинг асосий хулосалари шуни кўрсатадики, 11% ўсмирларда ижтимоий тармоқларга тобелик белгилари кузатилади. Қиз болалар орасида бу кўрсаткич ўғил болаларга нисбатан юқори. Ўсмирларнинг учдан бир қисмидан кўпроғи (36%) дўстлари билан мунтазам равишда онлайн алоқада бўлишади. Ўсмирларнинг тахминан 34 фоизи ҳар куни рақамли ўйинларни ўйнайди, уларнинг 22 фоизи кунига тўрт соатдан кўпроқ вақт сарфлайди.
Ўйинларга нисбатан муаммоли хатти-ҳаракатлар 12% ўсмирларда, кўпинча ўғил болаларда кузатилади.
Падуя университетидан маъруза ҳаммуаллифи Клаудия Марино таъкидлашича, ўсмирларнинг рақамли ўйинларга бўлган муносабатидаги гендер фарқлари ҳайратланарли. Ўғил болалар нафақат ҳар куни ўйнашга мойил, балки онлайн ўйинларга нисбатан муаммоли хулқ-атворни ҳам кўпроқ шакллантиради. Бу мотивациянинг гендер жиҳатлари ва хавф омилларини ҳисобга олган ҳолда мақсадли аралашувлар зарурлигини англатади.
