Yangihayot tumanidagi Davlat kadastr palatasi filialining sobiq boshligʻi 25 ming dollar pora olgani uchun 12 yil ozodlikdan mahrum etildi. Bu haqda Kun.uz sud qaroriga asoslanib xabar berdi.
Qarorga koʻra, u Toshkent shahrining Yangihayot tumanidagi Chortoq mahallasida joylashgan 20 sotixlik yer uchastkasidagi uy uchun kadastr hujjatlarini rasmiylashtirish evaziga 25 ming dollar pora talab qilgan.
Shuningdek, xabarda aytilishicha, 2024-yil 7-mart kuni DXX Toshkent shahar boshqarmasi xodimlari tomonidan tezkor tadbir oʻtkazilgan. Tadbir davomida I.S. oʻz xizmat xonasida pul olayotganda qoʻlga olingan.
I.S. sudda oʻz aybini tan olmadi va oʻsha paytda pulga muhtoj boʻlganini aytdi.
“Men fuqarodan 25 ming dollar olmoqchi edim, xodimni oʻlchov ishlari uchun uning yer uchastkasiga yubormoqchi va unga kadastr hujjatlari tez orada tayyor boʻlishini vaʼda qilmoqchi edim. Shu bilan birga, bu pullar hisobidan qarzlarimni toʻlashni va keyinchalik fuqaroga qaytarish uchun mablagʻ topishni rejalashtirgan edim,” dedi u sudda.
Uning aytishicha, unda yer uchastkalariga hujjatlarni toʻliq rasmiylashtirish vakolati boʻlmagan. Bu Toshkent shahar Kadastr boshqarmasining vakolatiga kiradi.
I.S.ning aybi guvohlarning koʻrsatmalari va boshqa dalillar bilan tasdiqlangan.
Sud I.S.ni Jinoyat kodeksining 210-moddasi 3-qismi “a” bandi (Pora olish) boʻyicha 12 yil muddatga ozodlikdan mahrum qildi. Shuningdek, unga moddiy javobgarlik bilan bogʻliq lavozimlarni egallash va Kadastr agentligi tizimida 3 yil davomida ishlash taqiqlandi.
