2025-yil yanvar oyi boshida o‘tkazilgan so‘rov natijalariga ko‘ra, Fransiya fuqarolarining 60 foizdan ortig‘i prezident Emmanuel Makronning iste’fosini yoqlagan. Bu ma’lumotlarni 3-yanvar kuni Le Figaro gazetasi e’lon qildi. Tadqiqotda mingdan ortiq kishi ishtirok etdi: 61% iste’fo g‘oyasini qo‘llab-quvvatladi, 38% qarshi chiqdi va 1% javob berishga qiynaldi.
Bundan tashqari, respondentlarning 62 foizi Makron siyosatini avtoritar siyosat deb ta’riflagan. So‘rovda qatnashganlarning deyarli 86 foizi prezident 2024-yil 13-dekabrda bu lavozimni egallagan “Demokratik harakat” partiyasi yetakchisi bosh vazir Fransua Bayruni almashtirishi kerak, deb hisoblaydi.
Makronga bo‘lgan ishonch 2024-yil sentyabr oyidan boshlab pasaya boshladi. Dekabr oyining oxiriga kelib, uning mashhurlik darajasi so‘nggi olti yil ichida eng past darajaga yetdi.
Eslatib o‘tamiz, 2024-yil iyun oyida prezident Milliy majlisni tarqatib yubordi va muddatidan oldin saylov tayinladi, unda “Yangi xalq fronti” so‘l partiyalar koalitsiyasi g‘alaba qozondi. Bu bosh vazir Gabriel Attalning iste’fosiga olib keldi. Mishel Barne hukumatning yangi rahbari bo‘ldi, ammo dekabr oyida u parlamentning qo‘llab-quvvatlashidan mahrum bo‘ldi va uning o‘rniga Fransua Bayru keldi.
Tanqidlarga qaramay, Makron 2027-yilda prezidentlik muddati tugagunga qadar o‘z lavozimini tark etmasligini aytdi va Konstitutsiya unga uchinchi muddatga nomzodini qo‘yishni taqiqlashini eslatdi.
