Istiqbolli loyihalar milliy agentligi Oʻzbekistondagi eng yirik “Binance” kriptobirjasining foydalanuvchilariga xizmat koʻrsatish masalalarini hal qildi. Endi platforma mahalliy hamkor - respublika qonunchiligiga muvofiq faoliyat yurituvchi “COINPAY” MCHJ kompaniyasi orqali ishlaydi.
“COINPAY” MCHJ kripto-aktivlar aylanmasi, shu jumladan kripto-birja va kripto-doʻkon faoliyati sohasida litsenziyalangan xizmat koʻrsatuvchi provayder hisoblanadi. Oʻzbekiston rezidentlari uchun Binance platformasiga kirish CoinPay resurslari orqali taqdim etiladi. Shuningdek, foydalanuvchilar bank kartalari va milliy toʻlov tizimlaridan foydalangan holda milliy valyutadagi mablagʻlarni toʻldirish va yechib olishlari mumkin boʻladi.
Tizimning rasmiy ishga tushirilishi hamkor platformalarning barcha modullarini milliy toʻlov tizimlari bilan integratsiya qilish yakunlangandan soʻng kutilmoqda. Ishga tushirish haqidagi maʼlumotlar Binance va CoinPay resurslarida paydo boʻladi.
2024-yil yanvar oyida agentlik Binanceʼni Oʻzbekiston qonunchiligini buzgani uchun jarimaga tortdi. 2024-yil mart oyidan iyun oyigacha davom etgan sud jarayoni natijasida sud kriptobirjaga bazaviy hisoblash miqdorining 300 baravari miqdorida jarima toʻlashni buyurdi. Binance barcha talablarni bajarib, jarimani toʻladi.
Shuningdek, oʻtgan yilning iyun oyida kriptovalyuta bilan noqonuniy operatsiyalar uchun ikki nafar yigit 3 va 10 sutkaga maʼmuriy qamoqqa olingan.
Agentlik 2023-yil 1-yanvardan Oʻzbekistonda kriptoaktivlar bilan operatsiyalarga faqat litsenziyalangan milliy provayderlar orqali ruxsat berilishini taʼkidladi. Fuqarolarga kriptovalyutalar bilan ishlashda qonunchilikka rioya qilish kerakligi eslatib oʻtildi.
