Hukumat davlat xaridlarida ishtirok etish uchun yetkazib beruvchilarni Yagona reyestrga kiritish boʻyicha davlat xizmatini koʻrsatishning maʼmuriy reglamentini tasdiqladi. Bu haqda Adliya vazirligi xabar berdi.
Hujjat yuridik va jismoniy shaxslarning arizalarini berish va koʻrib chiqish tartibini belgilaydi. 1-apreldan boshlab Davlat xizmatlari markazi yoki Yagona interaktiv davlat xizmatlari portali (my.gov.uz) orqali ariza topshirish mumkin.
Xizmat bepul koʻrsatiladi va arizani koʻrib chiqish muddati 15 ish kunini tashkil etadi. Reyestrga kiritish yoki kiritishni rad etish toʻgʻrisidagi qaror ariza beruvchining maʼlumotlari, tegishli organlarning xulosalari va tekshirish davomida toʻplangan boshqa maʼlumotlar asosida qabul qilinadi.
Eslatib oʻtamiz, 2025-yildan boshlab eBay Oʻzbekiston soliq tizimida “Internet-kompaniyalarning QQS ofisi” orqali rasmiy roʻyxatdan oʻtdi. Endi marketpleys allaqachon Netflix, Google, Apple va boshqa kompaniyalarni oʻz ichiga olgan 27 ta xorijiy elektron xizmat koʻrsatuvchilar roʻyxatiga kiritildi.
