11-mart kuni Navoiyda “Navoiyazot” korxonasining sexida gaz portlashi va yong‘in yuz berdi, deb xabar qilmoqda FVV matbuot xizmati.
Soat 14:10 da 25-sex laboratoriyasida gaz-havo aralashmasi alangalanishi haqida xabar keldi. Portlash natijasida yong‘in kelib chiqdi.
Hodisa joyiga 10 ta o‘t o‘chirish-qutqaruv guruhi yetib keldi. Yong‘in soat 14:20 da lokalizatsiya qilindi va soat 14:50 ga kelib to‘liq bartaraf etildi.
Hodisa oqibatida 1 kishi halok bo‘ldi, yana 11 kishi tan jarohati oldi. Fuqarolarga tibbiy yordam ko‘rsatilmoqda. Mutaxassislar sodir bo‘lgan voqeani tekshirmoqda.
