Ўзбекистон Президенти Шавкат Мирзиёев мамлакатда энергия ресурсларини тежашга қаратилган қонунни имзолади. Қонун энергия тежаш соҳасидаги ҳуқуқбузарликлар учун жавобгарликни назарда тутади ва қоидабузарларга жарималар белгилайди.
«Ўзенергоинспекция» каби назорат органлари мунтазам равишда текширишлар ўтказиб, энергия тежаш соҳасидаги қонунбузарликларни аниқлаб боради.
Жарималарнинг миқдори қоидабузарлик хусусиятига боғлиқ бўлади. Масалан, нефть маҳсулотларини сертификатланмаган қурилмалар билан етказиб берганлик учун охирги текшириш санасидан бошлаб сотилган товар қийматининг ярми миқдорида жарима тўлаш керак бўлади.
Давлат сифат стандартларига жавоб бермайдиган электр энергиясини етказиб берганлик учун етказиб берувчи етказиб бериш қийматининг 1 фоизи миқдорида молиявий жавобгарликка тортилади.
Агар кимдир рухсатсиз газ ускуналарини созлаш ёки текширишни амалга оширса, у ушбу иш қийматининг 10% миқдорида жаримага тортилади.
Агар ундириш миқдори компания активларининг 20 фоизидан ошса, уни олти ой давомида бўлиб-бўлиб тўлаш мумкин.
Агар биринчи қоидабузарлик ихтиёрий равишда бартараф этилган бўлса ёки форс-мажор ҳолатлари юзага келган тақдирда жарима ундирилмайди.
Қоидалар энергиядан, жумладан, нефть-газ, электр энергетикаси ва иситиш тармоқларидан фойдаланадиган корхона ва ташкилотларга нисбатан қўлланилади.
Қонун расмий эълон қилинган кундан уч ой ўтгач — 2024 йил 9 ноябрдан кучга киради.
