2025 йилдан Ўзбекистонда электромобилларнинг аккумулятор батареяларига утилизация йиғимини жорий этиш таклиф қилинмоқда. Бу ҳақда Spot.uz Иқтисодиёт ва молия вазирлигига таяниб хабар берди.
Утилизация йиғимини тайёр маҳсулотни импорт қилувчилардан ёки маҳаллий аккумулятор ишлаб чиқарувчилардан ундириш режалаштирилган. Шундай қилиб, янги солиқ электромобиллар эгаларига, шунингдек, машиналарни тайёр ҳолда импорт қилувчи жисмоний ва юридик шахсларга таъсир қилмайди, деб таъкидлади Иқтисодиёт ва молия вазирлиги.
Агар жорий этилса, солиқ батарея сиғимига қараб ўзгаради. Енгил электромобиллар учун утилизация тўлови 5 минг сўмдан 10 минг сўмгача, электр юк машиналари учун эса тахминан 370 минг сўмни ташкил этади.
Натижада Иқтисодиёт ва молия вазирлиги 14 млрд сўм атрофида маблағ йиғишни режалаштирмоқда. Олинган маблағлар кейинчалик Экология вазирлигига ўтказилиши режалаштирилган.
Йил бошидан саккиз ой давомида Ўзбекистонга қиймати $166,8 млн бўлган 12 913 та электромобил импорт қилинган. Импорт қилинган электр транспорт воситаларининг аксарияти - 99,4 фоизи Хитойдан келтирилади.
Шундан август ойида умумий қиймати 10,8 миллион долларлик 2471 дона етказиб берилди. Ойлик импорт ҳажми жорий йил бошидан буён максимал даражага етди.
