Oʻzbekiston va BAA kompaniyalari oʻrtasida qator yangi kelishuvlar imzolandi. Bu haqda Investitsiyalar, sanoat va savdo vazirligi matbuot xizmati xabar berdi.
13-yanvar kuni ikki mamlakat rasmiylari va kompaniyalari rahbarlari Abu-Dabida Shavkat Mirziyoyevning tashrifi arafasida uchrashuv oʻtkazdi. Tomonlar savdo-iqtisodiy va investitsiyaviy hamkorlikni rivojlantirish, shuningdek, uni kengaytirish imkoniyatlarini muhokama qildi.
2024-yil yakunlariga koʻra, oʻzaro tovar ayirboshlash hajmi 650 million dollarga yaqinlashdi. Oʻzbekistonda BAA investorlari ishtirokidagi 337 ta korxona, jumladan, 114 ta qoʻshma korxona va 223 ta xorijiy kompaniyalarning “shoʻba korxonalari” faoliyat yuritmoqda.
Oʻtgan yili oʻzlashtirilgan investitsiyalar hajmi qariyb 40 foizga oshib, 1,5 milliard dollardan oshdi. Energetika (shu jumladan, “yashil” energetika), kimyo sanoati, geologiya, transport va logistika, IT sohalarida loyihalar ustida ish olib borilmoqda.
Oʻzbekiston-BAA investitsiya kompaniyasi portfeliga tibbiyot, togʻ-kon, qishloq xoʻjaligi, turizm sohalarida 192,5 million dollarlik 7 ta loyiha kiritilgan. Umumiy qiymati 140 mln dollar boʻlgan yana 9 ta tashabbus ishlab chiqilmoqda.
Uchrashuvda AMEA Power, Masdar, Solar Power Shine, M42, Burjeel Holdings, IFFCO, TWS, Alserkal Group, Metito, AD Ports, Jetex, Emirates Group va boshqa kompaniyalar bilan yana 15 ta bitim va shartnomalar imzolandi.
Hujjatlar energetika va qishloq xoʻjaligi, suv taʼminoti, infratuzilma loyihalari, transport va logistika sohalariga tegishli. Masalan, “Jetex” bilan kelishuv “Toshkent-Sharqiy” aeroportini rivojlantirish va biznes aviatsiyasi sohasida xizmatlar koʻrsatishga taalluqli.
