2024-yil 1-fevraldan Oʻzbekistonda Open Budget platformasida tashabbusli byudjetlashtirishning birinchi mavsumi boshlanadi, deb xabar beradi Iqtisodiyot va moliya vazirligi matbuot xizmati.
Fuqarolar 20-fevralga qadar oʻz tashabbuslarini bildirishlari mumkin. Taklif etilgan loyihalarni tanlab olish 21-fevraldan 7-martgacha, soʻngra tashviqot davri 8-10-mart kunlari, ovoz berish esa 11-20-mart kunlari boʻlib oʻtadi. Natijalar va gʻoliblar roʻyxati 21-mart kuni eʼlon qilinadi.
Oliy Majlis Senati Kengashi tomonidan 13-yanvar kuni maʼqullangan oʻzgartirishlarga koʻra, har bir tuman yoki shaharda 10 tadan 30 tagacha loyiha qoʻllab-quvvatlanadi. Bu mablagʻ bilan taʼminlanadigan tashabbuslarning minimal va maksimal sonini belgilaydi.
Agar arizalar soni 10 tadan oshsa, budjet mablagʻlari aholi soniga mutanosib ravishda taqsimlanadi, bu esa yirik aholi punktlarini qoʻshimcha moliyalashtirishni taʼminlaydi.
Bitta loyihaning maksimal qiymati 1,5 mlrd soʻmni tashkil etadi. Shunday qilib, tashabbusli budjetlashtirish uchun ajratiladigan mablagʻlarning umumiy hajmi mahalliy budjetlardan 15 mlrd soʻmdan 45 mlrd soʻmgacha boʻladi.
