Oʻzbekiston prezidenti Shavkat Mirziyoyev 24-yanvar kuni Buxoro, Namangan va Nukus davlat texnika universitetlarini tashkil etish toʻgʻrisidagi qarorni imzoladi.
Buxoro muhandislik-texnologiya instituti va Buxoro tabiiy resurslarni boshqarish instituti negizida Buxoro davlat texnika universiteti tashkil etiladi. nima uchun?
Universitet muhandislik, ishlab chiqarish, oziq-ovqat texnologiyasi, yengil sanoat, neft va gaz, yashil energetika, arxitektura va qurilish, transport va logistika, agrotexnologiyalar, axborot texnologiyalari va dasturlash sohalari boʻyicha mutaxassislar tayyorlaydi.
Namangan davlat texnika universiteti Namangan muhandislik-texnologiya, Namangan muhandislik-qurilish va Toʻqimachilik sanoati institutlarini birlashtiradi. Unda muhandislik, qurilish, toʻqimachilik, axborot texnologiyalari va dasturlash, ishlab chiqarish, qayta ishlash va xizmat koʻrsatish sohalari boʻyicha mutaxassislar tayyorlanadi.
Nukus davlat texnika universiteti Navoiy davlat konchilik va texnologiyalar universiteti huzuridagi Nukus konchilik instituti va Toshkent axborot texnologiyalari universiteti Nukus filiali negizida tashkil etilmoqda.
Oliy oʻquv yurtlari qoshida, Bektemir davlat texnika universitetida, xususan, neft-gaz muhandisligi sohasida ilgʻor muhandislik maktablari tashkil etiladi. Ularda amaliyotga yoʻnaltirilgan taʼlim dasturlari boʻyicha oʻqish uchun yuqori akademik koʻrsatkichlarga ega boʻlgan talabalar tanlov asosida saralab olinadi.
Ilgʻor muhandislik maktabida yirik korxonalar orasidan sanoat hamkorlari tomonidan taqdim etilgan muammolar portfeli asosida ilmiy tadqiqotlar va tajriba-konstruktorlik ishlari olib boriladi.
Har ikki universitet kampuslarini yuqori tezlikdagi internet bilan taʼminlash vazifasi qoʻyildi.
Yangi oliy taʼlim muassasalarida talabalarning oʻzlashtirish koʻrsatkichlarini xalqaro tajriba asosida baholash tizimi joriy etilishi kutilmoqda. Oʻquv rejalariga ishlab chiqarish korxonalari takliflari asosida mustaqil taʼlim va tanlov fanlari kiritiladi.
Ish beruvchilar — korxona va tashkilotlarning real muammolari asosida bitiruv malakaviy ishlari va magistrlik dissertatsiyalari mavzulari banki shakllantiriladi hamda talabalarning bitiruv malakaviy ishlari va magistrlik dissertatsiyalarini ish beruvchilarda himoya qilish tashkil etiladi.
Oliy taʼlim muassasalarining professor-oʻqituvchilari va doktorantlari yetakchi xorijiy oliy taʼlim muassasalari va ilmiy-tadqiqot tashkilotlariga ilmiy stajirovka va malaka oshirishga yuboriladi.
