Oliy Majlis Qonunchilik palatasida “Adolat” SDP fraksiyasi yig‘ilishida Bola huquqlari bo‘yicha vakilning 2024-yilda davlat organlari, shu jumladan huquqni muhofaza qiluvchi tuzilmalar tomonidan bola huquqlari to‘g‘risidagi qonun hujjatlariga rioya etilishi holati yuzasidan axboroti ko‘rib chiqildi.
Yig‘ilishda “Milliy tiklanish” partiyasi yetakchisi Alisher Qodirov so‘zga chiqib, O‘zbekistonda bola huquqlarining buzilishi mavzusiga to‘xtaldi.
Uning ta’kidlashicha, birinchi sinfga kirishda bola ta’lim tilini tanlash huquqidan mahrum bo‘ladi - bu tanlovni uning o‘rniga ota-onalar amalga oshiradi.
“Bola 6-7-sinfga borganida, bu tildagi o‘quv materialini to‘liq o‘zlashtira olmaydi va o‘rganishda qiyinchiliklarga duch keladi. Natijada ota-onalarning ta’lim tilini tanlashdagi xatosi tufayli u o‘z hayotini muvaffaqiyatli qurish va zamonaviy fundamental bilimlarni olish imkoniyatidan mahrum bo‘ladi”, — deydi Qodirov.
Uning fikricha, bola aslida o‘z ona tilida emas, balki boshqa tilda o‘qishga majbur, bu esa ma’lum darajada uning huquqlarining buzilishi sifatida baholanishi mumkin. Shu munosabat bilan partiya tomonidan Bolalar ombudsmaniga tegishli takliflar kiritildi.
“Bola huquqlarini kamsitish yoki zo‘ravonlik bilan buzish holatlari kamdan-kam uchrasa-da, afsuski, jamiyatimizda shunday holatlar borki, biz yaxshi niyatda, o‘zimiz bilmagan holda bolalarimizning huquqlarini buzyapmiz”, — deya ta’kidladi Qodirov.
