Uzbekistan Airways samolyoti dvigatelining shikastlanishi tufayli Moskvadan Toshkentga uchishga muvaffaq bo‘lmadi. Bu hodisa haqidagi ma’lumotni SHOT xabar qildi.
Kecha aviakompaniya HY612 reysi texnik sabablarga ko‘ra majburan bekor qilinganini ma’lum qilgan edi.
“Yo‘lovchilar joriy yilning 5 va 6 mart kunlari amalga oshiriladigan aviakompaniyaning muqobil reyslarida tashib ketiladi. Reysni kutish davrida yo‘lovchilar mehmonxonaga joylashtiriladi”, — deyiladi xabarda.
SHOT’ning yozishicha, qo‘nish paytida teletrap samolyotning chap dvigateliga shikast yetkazgan, shu sababli parvoz kechiktirilgan. Shikastlangan samolyot hamon Moskvaning Vnukovo aeroportida turibdi.
