Oʻzbekistonda kriptoaktivlar sohasida xizmat koʻrsatuvchi Coinpay va Binance qoʻshma platformasi ish boshladi. Bu haqda Coinpay kriptobirjasining matbuot xizmati xabar berdi.
Loyiha Istiqbolli loyihalar milliy agentligi (ILMA) koʻmagida amalga oshirildi va respublika qonunchiligiga toʻliq mos keladi. ILMA 2025-yil yanvar oyida kripto-birjalar oʻrtasidagi hamkorlik rejalarini eʼlon qildi. Yangi xizmat Oʻzbekistonda birinchi boʻlib mamlakat huquqiy tizimiga rasman integratsiya qilingan.
Platforma foydalanuvchilarga bank kartalari va mahalliy toʻlov tizimlari orqali milliy valyutadagi mablagʻlarni toʻldirish va yechib olish, shuningdek, Binance xizmatlaridan foydalanish imkonini beradi. Coinpay kriptovalyuta operatsiyalari faqat kompaniya veb-saytida rasmiy havola orqali amalga oshirilishi kerakligi, tashqi P2P platformalari yoki boshqa xizmatlardan foydalanish esa qonunchilikni buzishi va yuridik javobgarlikka sabab boʻlishi mumkinligi haqida ogohlantirgan.
Kompaniya, shuningdek, kriptoaktivlar bilan ishlashda ularning oʻzgaruvchanligi tufayli yuqori xatarlar borligini eslatib oʻtdi. Foydalanuvchilarga operatsiyalarni boshlashdan oldin bozor xususiyatlarini sinchiklab oʻrganish tavsiya etiladi.
Binance va boshqa xalqaro kriptobirjalarning saytlari Oʻzbekistonda 2022-yil avgust oyida bloklangan edi. Keyinchalik Binance mahalliy bozorda ishlash uchun bosh menejer lavozimini ochdi. Biroq, 2023-yilda ILMA p2p-bitimlarni nazorat qilishning murakkabligi sababli qonuniylashtirishdan bosh tortdi.
2024-yil boshida agentlik Binanceʼga litsenziyasiz xizmatlar koʻrsatganligi va respublikada serverlari yoʻqligi uchun 102 million soʻm jarima solgan. Sud jarayoni ikki yarim oy davom etdi va ILMA foydasiga hal qiluv qarori bilan yakunlandi. Binance davlat budjetiga jarima toʻlab, sud talablarini bajardi.
