3-fevral, dushanba kuni ispaniyalik futbolchi Jenni Ermoso Ispaniya futbol federatsiyasining sobiq prezidenti Luis Rubialasga qarshi sud jarayonida ishtirok etdi. U 2023-yilgi futbol boʻyicha jahon chempionatida gʻalaba qozonganidan soʻng terma jamoani taqdirlash chogʻida sodir boʻlgan boʻsaga rozilik bermaganini tasdiqladi.
Sportchining soʻzlariga koʻra, Rubial uning boshidan ushlab, lablaridan oʻpgan, bu uning fikricha doʻstona ishora doirasidan chetga chiqqan. Ermosoning taʼkidlashicha, bunday xatti-harakatlarga har qanday kontekstda yoʻl qoʻyib boʻlmaydi.
Rubialas futbolchiga jinsiy zoʻravonlik va uni oʻzaro boʻsa boʻlganini aytishga majburlash uchun bosim oʻtkazishda ayblanmoqda. Prokuratura unga 2,5 yil qamoq jazosi berishni talab qilmoqda. U bilan birga sudlanuvchilar kursisida Ermosoga bosim oʻtkazishda ayblanayotgan Ispaniya futbol federatsiyasining yana uch sobiq amaldori ham bor edi.
Sud jarayoni 19-fevralga qadar davom etadi.
Jahon chempionatidagi janjal
Voqea 2023-yil avgust oyida Avstraliyada Ispaniya ayollar terma jamoasini taqdirlash marosimida sodir boʻlgan. Rubialas minbarda Ermosoni oʻpdi va keyinchalik buni his-tuygʻular shiddati va uning roziligi bilan qilganini aytdi. Biroq futbolchi bu soʻzlarni rad etib, uni shilqimlikda aybladi.
Voqeadan keyingi dastlabki kunlarda ijtimoiy tarmoqlarda Ermoso nomidan bayonot paydo boʻldi, unda bu boʻsa “tabiiy ishora” boʻlgani taʼkidlangan. Keyinchalik maʼlum boʻlishicha, bu post uning ruxsatisiz eʼlon qilingan.
Janjal keng jamoatchilik eʼtirofiga, ispan siyosatchilari tomonidan qoralanishiga va Ermosoning ommaviy qoʻllab-quvvatlanishiga sabab boʻldi. Rubialas oʻz lavozimini egallab turgan paytda 80 dan ortiq futbolchi ayol terma jamoada oʻynashdan bosh tortgan. 2023-yilning kuzida u isteʼfoga chiqdi va FIFA tomonidan uch yilga futbol bilan bogʻliq har qanday faoliyatdan chetlashtirildi.
Bu voqea sportda ayollarning teng huquqlari uchun kurashadigan #SeAcabó (“Hammasi tugadi”) harakatiga turtki boʻldi va #MeToo kampaniyasining analogiga aylandi.
