1 августдан Ўзбекистонда енгил автомобиллар учун метаннинг чакана нархига чеклов тўхтатилди. Эндиликда тадбиркорлар ёқилғи нархини ўзлари белгилайди. 1 август куни бош вазир Абдулла Арипов ёқилғи-энергетика масалаларига бағишланган йиғилиш ўтказди.
Париждаги Олимпия ўйинларида Ўзбекистон терма жамоаси дзюдочиси Музаффарбек Тўрабоев бронза медалини қўлга киритди.
Коррупцияга қарши курашиш агентлиги давлат органларининг 2024 йилнинг олти ойи давомидаги фаолиятини таҳлил қилди. Вазирлик ва идораларнинг ярмидан камроғи давлат харидлари тўғрисидаги маълумотларни ўз вақтида ошкор қилган. Спорт вазирлиги ва Тиббиёт билим юрти энг яхши натижаларга эришди.
«Ўзбекконцерт» концерт ва томоша фаолияти билан шуғулланувчи санъаткорлар маъмурлари ҳам тегишли лицензияга эга бўлиши кераклиги ҳақида огоҳлантирди. Акс ҳолда, қоидабузарлар 15 дан 25 БҲМгача жаримага тортилади.
2 август куни Ўзбекистонда 40 даража иссиқ бўлиши кутилмоқда, ёғингарчилик бўлмайди. Куннинг иккинчи ярмида бироз шамол бўлиши мумкин.
Истеъмолчилар ҳуқуқларини ҳимоя қилиш қўмитаси текширув давомида барча машҳур компанияларнинг гугуртлари, шу жумладан, Россиядан олиб келинганлари ҳам ГОСТ талабларига жавоб бермаслигини аниқлади. Таҳлиллар 29,8 фоиз кам тўлдирилган гугурт маҳсулотлари сотилганини кўрсатди.
Сафар давомида купедаги совитиш тизими ишламаса, йўловчилар тегишли далиллар билан Рақобат қўмитаси ёки «Ўзтемирйўлйўловчи» АЖга мурожаат қилиши мумкин. Маълумот тасдиқланса, тегишли пул компенсация сифатида қайтарилади.
2024 йил 1 январь ҳолатига кўра, Ўзбекистонда фаолият кўрсатаётган маданият ва истироҳат боғлари сони 129 тани ташкил этди. Статистика агентлиги ҳудудларда фаолият юритаётган истироҳат боғлари рўйхатини ҳам тақдим этди.
Ўзбекистон Ташқи ишлар вазирлиги раҳбари Италия Вазирлар кенгаши раиси Джорджа Мелони билан учрашди. Мелони қисқа муддатга Тошкентга учиб келган.
Халқ депутатлари Тошкент шаҳар кенгаши томонидан 20 та баланд пиёдалар ўтиш жойининг дастлабки қурилиш ишлари учун 53,6 млрд сўм маблағ ажратилди. Қурилиш ишларига жами 107,2 млрд сўм маблағ сарфланади.
2024 йилда Ўзбекистон аҳолиси 334 мингдан зиёдга кўпайиб, 37 миллион 134,2 минг кишини ташкил қилди. Аҳолининг ўртача ёши эркакларда 28,5 ёш, аёлларда 30 ёш.
Фарғона вилоятида Cobalt ҳайдовчиси йўл четида кетаётган беш нафар пиёдани уриб юборди. Ҳодиса оқибатида тўрт киши ҳалок бўлган. Суд уни тўққиз йилга озодликдан маҳрум қилди, шунингдек, у уч йилга машина ҳайдаш ҳуқуқидан маҳрум қилинди.
1 августдан Грузияда хорижий агентлар ҳақидаги қонун кучга кирди. Унда даромадининг 20 фоиздан ортиғини хориждан оладиган нодавлат нотижорат ташкилотлари ва оммавий ахборот воситаларини Давлат рўйхатидан ўтказиш миллий агентлигида рўйхатдан ўтказиш мажбурияти юкланган.
Солиқ қўмитаси томонидан Soliq мобил иловасига Soliq Biznes бўлими қўшилди. Унда юридик шахслар учун шахсий кабинет мавжуд.
Бухоро вилоятининг Пешқун туманида эркак ўз хотинини ўлдириб, кейин ўз жонига қасд қилди. Мазкур ҳолат юзасидан Бош прокуратура томонидан «Қасддан одам ўлдириш» моддаси бўйича жиноий иш қўзғатилган.
1 август куни Тошкент ҳавосидаги PM2,5 концентрацияси Жаҳон соғлиқни сақлаш ташкилоти (ЖССТ) томонидан тавсия этилган меъёрдан 9,9 баробар ошиб кетди.
Asosiy voqealardan birinchi boʻlib xabar topish uchun Telegram kanalimizga obuna boʻling.