Adaptiv sport assotsiatsiyasi A.I.Gersen nomidagi Rossiya davlat pedagogika universiteti bilan birgalikda sportchilarni tayyorlashning ilmiy usullarini ishlab chiqmoqda. Ushbu universitetning Toshkent shahridagi filialida adaptiv sport fakultetini ochish rejalashtirilgan. Bu haqda prezident matbuot kotibi Sherzod Asadov xabar berdi.
Para sportchilar bilan ishlaydigan murabbiylar uchun malaka sertifikatini olish tizimi soddalashtiriladi. Qayta tayyorgarlikdan oʻtish ham oson boʻladi.
Bundan tashqari, milliy terma jamoalarga sportchilarni saralab olish tizimi ham oʻzgaradi. Ilgari u yerga faqat respublika musobaqalari gʻoliblari borardi. Endi nogironligi boʻlgan sportchilar sport normativlarini bajarishdagi natijalariga qarab tanlab olinadi.
Musobaqalar va oʻquv-mashgʻulot yigʻinlarini tashkil etish qoidalari ham oʻzgarmoqda. Endi chempionatlar Olimpiya va Paralimpiya oʻyinlari tizimi boʻyicha oʻtkaziladi. Demak, asosiy musobaqalar bilan birga parasport turnirlari ham boʻlib oʻtadi. Mashgʻulotlar esa barcha sportchilar uchun umumiy boʻladi.
Soʻnggi uch yilda parasport bilan shugʻullanuvchilar soni 4 barobar koʻpayib, 7 mingdan oshdi. Ularning 29 foizini ayollar tashkil etadi. Imkoniyati cheklangan yoshlar uchun sport toʻgaraklari ham koʻpaydi. Ilgari 33 ta maktabda boʻlgan boʻlsa, hozir 235 taga yetdi.
Mamlakatimizning turli hududlarida parasportchilar uchun 39 ta ixtisoslashtirilgan sport maktablari faoliyat koʻrsatmoqda.
Bundan tashqari, har yili 100 dan ortiq sportchi va murabbiylar xorijda malaka oshirib qaytmoqda.
Eslatib oʻtamiz, Oʻzbekistonda olimpiya sport turlari boʻyicha yangi musobaqalar tizimi — “Yangi Oʻzbekistonning Olimpiya choʻqqilari” paydo boʻladi. Turnirlar yiliga ikki marta hududlarda oʻtkaziladi, eng yaxshi sportchilar uy-joy va avtomobil bilan taqdirlanadi.
