Bugun, 6-fevral kuni Oliy Majlis Senati Raisining birinchi oʻrinbosari Sodiq Safoyev Turkiyaning Oʻzbekistondagi Favqulodda va muxtor elchisi Olgan Bekar bilan uchrashuv oʻtkazdi.
Tomonlar ikki mamlakat yetakchilarining oʻzaro ishonchi va doʻstona munosabatlari tufayli Oʻzbekiston–Turkiya hamkorligi yangi bosqichga koʻtarilib, har tomonlama strategik sheriklik mustahkamlanganini taʼkidladilar.
Elchi Oʻzbekistonda amalga oshirilayotgan demokratik islohotlarni ijobiy baholab, qoʻshma loyihalarda ishtirok etayotganidan mamnunligini bildirdi.
Uchrashuvda parlamentlararo aloqalarni kengaytirish, doʻstlik guruhlari va hududlararo hamkorlikni faollashtirishga alohida eʼtibor qaratildi. Parlamentlararo muloqotni rivojlantirish iqtisodiy, investitsiyaviy, texnologik va madaniy-gumanitar sohalarda oliy darajada erishilgan kelishuvlarni amalga oshirishga xizmat qilayotgani taʼkidlandi.
