Ijtimoiy himoya milliy agentligida UNFPA vakillari bilan uchrashuv boʻlib oʻtdi. Unda 2026–2030-yillarga moʻljallangan Mamlakat dasturi loyihasi koʻrib chiqildi va hamkorlikning asosiy yoʻnalishlari belgilandi. Ustuvor vazifalar qatoriga zaif guruhlar himoyasini kuchaytirish, ijtimoiy xizmatlarni kengaytirish va keng koʻlamli tadqiqotlar oʻtkazish kiradi.
Oʻzbekiston Milliy banki tadbirkorlarga qulay shartlarda ijaraga yoki lizingga berish uchun tijorat koʻchmas mulklarini sotib olishga 500 mlrd soʻm sarmoya kiritadi. Shuningdek, 4 trillion soʻmlik boʻsh turgan noturar joylar lizingga berilib, minglab ish oʻrinlari yaratilishi rejalashtirilgan.
Oʻzbekistonda elektromobillar uchun utilizatsiya yigʻimini oshirish rejalashtirilgan. Akkumulyatorlarni qayta ishlash sanoatini rivojlantirish va mahalliy sanoatni qoʻllab-quvvatlashga qaratilgan. Rasmiylarning taʼkidlashicha, bu chora JST meʼyorlariga mos keladi va atrof-muhitni himoya qilishga yordam beradi.
Transparency International korrupsiyaga qarshi kurashish xalqaro tashkiloti 2024-yil uchun Korrupsiyani qabul qilish indeksini eʼlon qildi. Oʻzbekiston 180 ta davlat orasida 121-oʻrinni egalladi va oʻtgan yilga nisbatan bir ball yoʻqotdi. Mamlakat korrupsiya xavfi yuqori boʻlgan hududda qolmoqda.
Respublikada masʼuliyati cheklangan jamiyatlar soni ortib bormoqda. Soʻnggi besh yilda ularning soni qariyb 1,7 barobarga oshib, 2025-yil 1-yanvar holatiga 479 948 taga yetdi.
Toshkentda litsenziyasiz xizmat koʻrsatgan stomatologiya klinikasi aniqlandi. Tekshiruv davomida bolalarni davolash tibbiy standartlarga zid ravishda olib borilgani aniqlangan. Muassasaga nisbatan qonunbuzarliklarni bartaraf etish toʻgʻrisida koʻrsatma berildi.
Markaziy bankning Bank nazorati qoʻmitasi yanvar oyidagi yigʻilishlarni yakunladi. Asosiy eʼtibor kredit tashkilotlarini roʻyxatga olish, litsenziyalash va moliyaviy holat masalalariga qaratildi. Tekshiruvlar natijasida ayrim banklar va toʻlov operatorlariga jarima va ogohlantirishlar berilgan.
Milliy gvardiya xodimlari voyaga yetmaganlarning ota-onalariga ularning farzandlari tomonidan yoʻl qoʻyilgan huquqbuzarliklar uchun jarima solish huquqiga ega boʻldi. Milliy gvardiyaning yangi vakolatlari oʻsmirlar oʻrtasida huquqbuzarliklar profilaktikasini kuchaytirish va ota-onalarning masʼuliyatini oshirishga qaratilgan.
Surxondaryoda bojxonachilar qiymati 16,5 mln dollardan ortiq boʻlgan 612 kg gashish giyohvandlik moddasining yirik partiyasini aniqladi. Giyohvand moddalarni supurgi dastasiga yashirib, Afgʻonistondan olib kirishga harakat qilishgan.
Joriy haftaning birinchi yarmida Oʻzbekiston boʻyicha vaqti-vaqti bilan asosan qor koʻrinishidagi yogʻingarchilik boʻladi. Kunduzgi harorat 0...+5 daraja boʻladi.
Olgan Bekar Turkiya elchisi sifatidagi diplomatik missiyasini yakunlamoqda. Oʻzbekiston elchiga ikki tomonlama munosabatlarni rivojlantirishga qoʻshgan salmoqli hissasi uchun samimiy minnatdorlik bildirdi.
Oʻzbekistonda ijarachilarning mustaqilligi va yuqori qoʻshilgan qiymatli ekinlarni yetishtirish asosida qishloq xoʻjaligi uchun yer uchastkalarini ajratishning yangi tizimi joriy etilmoqda.
Oʻzbekiston prezidenti dunyoning yetakchi 1000 ta oliy taʼlim muassasasi qatoriga kiruvchi universitetlar sonini 2 tadan 10 taga yetkazish vazifasini qoʻydi. Shuningdek, davlat rahbari investitsiyalarni jalb qilish va madaniyat sohasini jonlantirish uchun foydalanilmayotgan 120 ta madaniyat markazini biznesga berish boʻyicha topshiriq berdi.
Oʻzbekiston va Malayziya ziyorat turizmi sohasida hamkorlikni faollashtirmoqda. Hamkorlik doirasida maʼnaviy ziyorat va madaniy sayohatlarni birlashtirgan yangi “Umra plyus” yoʻnalishlarini ishlab chiqish rejalashtirilgan.
Oʻzbekiston Misrning “Minapharm” kompaniyasi koʻmagida zamonaviy dori vositalari ishlab chiqarishni yoʻlga qoʻyishni rejalashtirmoqda. Misrdan mutaxassislar bozorni oʻrganish va kadrlar tayyorlash uchun fevral oyidayoq mamlakatga keladi.
2024-yil yakuniga koʻra, Oʻzbekistonda elektr energiyasi va tabiiy gazni talon-toroj qilish bilan bogʻliq 1,2 mingdan ortiq huquqbuzarlik aniqlangan. Energiya resurslaridan noqonuniy foydalanish oqibatida 600 mlrd soʻmlik zarar yetkazilgan.
Asosiy voqealardan birinchi boʻlib xabar topish uchun Telegram kanalimizga obuna boʻling.