Amerika delegatsiyasi Ukrainaga mamlakat mineral resurslarining yarmi AQSH nazoratiga oʻtishi mumkin boʻlgan shartnomani taklif qildi. Ammo prezident Vladimir Zelenskiy hujjatni oʻrganish imkoniyatiga ega boʻlmaganini aytib, rad javobini berdi. Kiyev konstitutsiya normalarini hisobga olgan holda oʻz taklifini taqdim etmoqchi.
88 yoshli Papa Fransisk bronxitni davolash uchun Rim klinikasiga olib kelingan. Sogʻligʻi bilan bogʻliq muammolarga qaramay, u oʻz vazifalarini bajarishda davom etmoqda va lavozimni tark etish imkoniyatini koʻrib chiqmayapti. Vatikan uning kasalxonada qancha vaqt qolishiga aniqlik kiritmagan.
Germaniyada 14-16-fevral kunlari boʻlib oʻtadigan 61-Xavfsizlik boʻyicha Myunxen konferensiyasi boshlandi. Dunyo yetakchilari mudofaa va xavfsizlikning asosiy masalalarini muhokama qiladi. Eʼtibor markazida Rossiya–Ukraina urushi va uni hal qilish istiqbollari.
AQSH prezidenti Donald Trampning taʼkidlashicha, Rossiya va AQSH rasmiylari 14-fevral kuni Myunxen xavfsizlik konferensiyasi doirasida Ukraina mojarosini hal qilish boʻyicha muloqot oʻtkazadi. AQSH rahbarining qoʻshimcha qilishicha, tadbirga Ukraina vakillari ham taklif qilingan.
2024-yilda Rossiyaning mudofaa uchun umumiy xarajatlari 42 foizga oshib, 462 milliard dollarni tashkil etdi. Bu koʻrsatkich barcha Yevropa Ittifoqi mamlakatlari va Buyuk Britaniyaning mudofaa byudjetidan oshib ketdi.
Bloomberg tahlilchilari Rossiya–Ukraina mojarosi yakunlanishining uchta ehtimoliy ssenariysini koʻrsatib oʻtdi. Eng ehtimoliy variant — anneksiya qilingan hududlar ustidan qisman Rossiya nazorati saqlanib qolgan holda hozirgi status-kvoning davom etishi. Optimistik ssenariyda Ukraina xavfsizlik kafolatlari va Gʻarbning qoʻllab-quvvatlashini oladi, eng yomoni esa Amerika yordamisiz qolishi mumkin.
Telegram`ning yangi yangilanishida oʻrnatilgan videopleyer yaxshilandi, endi u toʻxtash joyini eslab qoladi va maʼlum bir vaqt uchun havolalarni ulashish imkonini beradi. Sunʼiy intellekt stikerlarini qidirish maxsus toʻplamlar uchun mavjud boʻldi. Bot profillarida esa shunga oʻxshash xizmatlar va mini-ilovalar tavsiya etilgan yorliq paydo boʻldi.
1991-yil 13-fevral Iroq tarixida qora kun boʻlgan. Bundan roppa-rosa 34 yil muqaddam “Sahrodagi boʻron” operatsiyasi davomida AQSH harbiylari Bagʻdoddagi “Amiriya” bombapanohiga aviazarba bergandi. Bu fojia yuzlab tinch aholining, asosan ayollar va bolalarning hayotiga zomin boʻldi va Fors koʻrfazidagi urushning eng dahshatli epizodlaridan biriga aylandi.
AQSH prezidenti Donald Tramp ilk bor Rossiya prezidenti Vladimir Putin bilan telefon orqali muloqot qildi. Suhbat bir yarim soat davom etdi. Davlat rahbarlari Ukrainadagi mojaroni toʻxtatish va zudlik bilan muzokaralar jarayonini boshlash zarurligiga rozi boʻldi.
Jahon sogʻliqni saqlash tashkiloti past va oʻrta daromadli mamlakatlar bolalariga onkologik dori vositalarini bepul olish imkonini beruvchi yangi platformani ishga tushirdi. Dori-darmonlarning birinchi partiyasi allaqachon Oʻzbekiston va Moʻgʻulistonga yetib kelgan. JSST tashabbusni 50 ta davlatga kengaytirishni va 120 ming bolani davolashni rejalashtirmoqda. Loyihani Avliyo Iuda bolalar tadqiqot kasalxonasi qoʻllab-quvvatladi.
Donald Tramp va Ilon Maskning rasmiy bayonoti chogʻida kutilmaganda sammit emas, balki toʻrt yoshli X Æ A-Xii eʼtiborni tortdi. Kattalar davlat islohotlarini muhokama qilishayotganda, bola otasining gapini boʻlib, AQSH prezidenti bilan suhbatlashib, koʻngilxushlik qildi.
Armaniston parlamenti mamlakatning Yevropa Ittifoqiga qoʻshilish jarayoni toʻgʻrisidagi qonun loyihasini qoʻllab-quvvatladi, biroq muxolifat ikkiga boʻlindi. Hujjatni faqat hukmron fraksiya maʼqullagan, YEIga aʼzolik boʻyicha yakuniy qaror esa, bosh vazir Nikol Pashinyanning soʻzlariga koʻra, referendumda qabul qilinishi kerak.
Xitoyda koʻchmas mulk sohasidagi inqiroz kuchaymoqda. Xavflar ortib bormoqda, chunki rasmiylar Xitoyda birinchi qutqaruv operatsiyasini oʻtkazishga majbur boʻlmoqda va Gonkongning mashhur New World kompaniyasi obligatsiyalari moliyaviy qiyinchiliklarga duch kelmoqda.
Milliarder Alisher Usmonovning sobiq rafiqasi Irina Viner badiiy gimnastika boʻyicha Rossiya terma jamoasi bosh murabbiyligidan ketdi. Samarqandlik Alina Kabayeva, Margarita Mamun va Yevgeniya Kanayeva kabi chempionlarni tarbiyalagan.
AQSH Davlat departamenti byudjetini optimallashtirish doirasida prezident Donald Tramp maʼmuriyati mamlakatning butun dunyo boʻylab bir qator konsullik muassasalarini yopish imkoniyatini koʻrib chiqmoqda. NBC jurnalistlari maʼlumotlariga koʻra, Kanada, Meksika, Tinch okeani orollari, shuningdek, Yevropadagi konsulliklar qisqartirilishi mumkin.
Saudiya Arabistoni hukumati 2025-yilda Haj ziyoratchilariga oʻzlari bilan bolalar olib borishni taqiqlash toʻgʻrisida qaror qabul qildi. Bu koʻp sonli odamlar toʻplangan sharoitda ularning xavfsizligi haqida qaygʻurish bilan bogʻliq.
Asosiy voqealardan birinchi boʻlib xabar topish uchun Telegram kanalimizga obuna boʻling.