Ergash Soliyev boshqa ishga oʻtishi munosabati bilan Jizzax viloyati hokimi lavozimidan ozod etildi. HET boshqaruvi raisi lavozimida ishlab kelgan Ulugʻbek Mustafoyev hokim vazifasini bajaruvchi etib tayinlandi.
Toshkent xalqaro aeroportining uchish zalida royal oʻrnatildi. Musiqiy asbobni tegishli koʻnikmalarga ega boʻlgan barcha xohlovchilar chalishi mumkin. Jonli musiqa koʻngilxushlik va parvozdan oldingi stressdan xalos boʻlish usuliga aylanadi, deya taʼkidladi Uzbekistan Airports.
Toshkentda Alisher Navoiy nomidagi Oʻzbekiston Milliy kutubxonasi oldidagi maydonda yangi yil archasi oʻrnatildi. Archaning balandligi 33 m. U 33 mingta oʻyinchoq va umumiy uzunligi 14 ming metr boʻlgan 3500 ta archa chiroqlari bilan bezatilgan.
Oʻzbekiston Wanderlust jurnali versiyasiga koʻra dunyodagi eng istiqbolli sayyohlik yoʻnalishi deb tan olindi. Reader Travel Awards mukofotining ovoz berishida 168 ming kishi ishtirok etdi.
Oʻzbekistonda mahalliy dori vositalari va farmatsevtika startaplarini qoʻllab-quvvatlash uchun 20 mlrd soʻm grantlar ajratiladi. Bu maqsadga erishish uchun “Asakabank”, Farmatsevtika tarmogʻini rivojlantirish agentligi va yirik korxonalar kelgusi yil yakuniga qadar tegishli dasturni ishlab chiqadi.
19-dekabr kuni Oʻzbekistonda havo harorati pasayishi kutilmoqda. Toshkentda kechqurun biroz yomgʻir yogʻishi mumkin. Eslatib oʻtamiz, 20-22-dekabr kunlari respublika boʻylab nam va sovuq massalar kirib kelishi kutilmoqda.
Adliya vazirligi kriptobirjalar, mayning, depozitariylar va doʻkonlar uchun litsenziyalar qiymatini belgilovchi buyruqni roʻyxatdan oʻtkazdi. Boj miqdori faoliyat turiga bogʻliq boʻlib, bazaviy miqdorlarda hisoblanadi. Yangi tartib kriptovalyutalar bilan ishlashni tartibga solishga qaratilgan.
Oliy Majlis Senati Oʻzbekistonning kelgusi yilga moʻljallangan byudjeti toʻgʻrisidagi qonun loyihasini maʼqulladi. Konsolidatsiyalashgan budjet daromadlari 431 trln soʻmni, xarajatlari 480,5 trln soʻmni tashkil etadi.
UzSAT SES bilan hamkorlikni mustahkamlamoqda va sunʼiy yoʻldosh aloqasining ilgʻor texnologiyalarini joriy etmoqda. Oʻzbekiston O3b mPower tizimi uskunalarini sinovdan oʻtkazgan birinchi davlatlardan biri boʻldi. VSAT infratuzilmasining qurilishi internet va raqamli xizmatlardan foydalanishni kengaytiradi. Qoʻshma loyihalar oʻzbek telekanallarining xalqaro auditoriyaga uzatilishini taʼminlaydi.
2028-yildan boshlab elektr energiyasi va gaz uchun davlat byudjetidan subsidiyalar ajratishni toʻxtatish rejalashtirilmoqda. Iqtisodiyot va moliya vaziri Jamshid Qoʻchqorov yalpi majlisda 2025-yilda issiq suv va isitish tariflarini hatto ikki baravar oshirish ham yetarli boʻlmasligi mumkinligini maʼlum qildi.
Toshkentda pulli avtoturargohlarni tashkil etish huquqi uchun oʻtkazilgan takroriy auksion 62,93 mlrd soʻm taklif qilgan Streetpark Systems kompaniyasining gʻalabasi bilan yakunlandi. Gʻolib 2025-yil avgustiga qadar 13,2 mingta avtoturargoh yaratish va ularni jihozlash uchun kamida 5 million dollar sarmoya kiritishi kerak.
Markaziy Osiyo mamlakatlarida aholining terroristik radikallashuvi xavfi sezilarli darajada oshdi, deb xabar berdi GCERF. Terrorchilik xavfining ortishining asosiy omillari orasida kambagʻal yoshlarning koʻpligi ham bor.
Rossiyada Rossiya Qurolli Kuchlarining radiatsion, kimyoviy va biologik himoya qoʻshinlari boshligʻi Igor Kirillov va uning yordamchisini oʻldirishda gumon qilingan Oʻzbekiston fuqarosi qoʻlga olindi. Unga 100 ming dollar mukofot va yashash uchun Yevropa mamlakatlaridan biriga borish vaʼda qilingan.
Fargʻonadagi koʻp yoqilgʻi quyish shoxobchasida portlash va undan keyingi yongʻindan soʻng toʻrt kishi shifoxonada vafot etdi. Tegishli ish doirasida besh kishi qoʻlga olinib, tergov harakatlari olib borilmoqda.
Oʻzbekistonda erkaklar uchun dekret taʼtilini joriy etish rejalashtirilmoqda. Otalarga bola tugʻilganda 5 kunlik haq toʻlanadigan taʼtil beriladi.
Oʻzbekistonda Oliy Majlis deputatlari mahkumlarga yaqinlari bilan video muloqot oʻtkazish imkonini beruvchi qonun loyihasini birinchi oʻqishda maʼqulladi.
Asosiy voqealardan birinchi boʻlib xabar topish uchun Telegram kanalimizga obuna boʻling.